كود سبور//

غيكون الإتحاد الإفريقي لكرة القدم من الداعمين البارزين للسويسري جياني إنفانتينو رئيس الاتحاد الدولي لكرة القدم، باش يواصل المهام ديالو على رأس “الفيفا” لولاية جديدة مقبلة.

وأعلن باتريس موتسيبي رئيس الاتحاد الإفريقي لكرة القدم خلال الجمعية العمومية ديال الكاف المقامة فتانزانيا أن الأعضاء ديال الإتحاد الإفريقي ولي كيبلغ العدد ديالهم فالقارة الإفريقية 54 إتحاد وطني، غيدعمو الترشح ديال السويسري إنفانتينو باش يضيف ولاية ثانية كرئيس ديال الإتحاد الدولي “الفيفا”، وغيصوتو عليه بالإجماع.

وكان جياني إنفانتينو رئيس الاتحاد الدولي لكرة القدم، علن فوقت سابق على أنه غيترشح من أجل رئاسة “الفيفا” لولاية ثانية، خلال فعاليات الجمعية العمومية ديال الإتحاد الدولي لي غتكون فسنة 2023، مع العلم أنه تم الانتخاب ديالو سنة 2016 كرئيس ديال “الفيفا” وسنة 2019 أيضا.

من جهة أخرى، كتوجه انتقادات كثيرة لجياني إنفانتينو رئيس الاتحاد الدولي لكرة القدم بسبب علاقتو مع الاتحاد الإفريقي للعبة، فالكثير من المتبعين ديال كرة القدم العالمية والإفريقية، كيشوفو أن السويسري انفانتينو، وملي صبح رئيس ديال “الفيفا” بدا كيلعب دور الوصي على كرة القدم الإفريقية، وكيحاول يسيطر على تسيير وإدارة الإتحاد الإفريقي وهادشي ماشي فقط فالحقبة ديال رئيس “الكاف” الحالي باتريس موتسيبي، ولكن هاذ الحديث والانتقادات بدات كتروج من بعدما صبح الملغاشي أحمد أحمد رئيس ديال “الكاف” بعد رحيل الكاميرون عيسى حياتو.