كود الرباط//
رد ادريس الازمي، رئيس المجلس الوطني لحزب العدالة والتنمية، على التصريحات الصادرة عن عبد اللطيف وهبي، الامين العام لحزب الاصالة والمعاصرة، الاخير اللي برر الدفاع عن القاسم الانتخابي على اساس المسجلين بأنه في مصلحة الاحزاب الصغيرة، :”هاد الحزب جا باش يقضي على الحياة السياسية وهو الحزب المهيمن ماشي حنا”.
وأضاف الازمي، خلال تسجيل فيديو تحط فالفايسبوك، :”البام تبنى على الهيمنة للقضاء على الاحزاب والتحكم فيها بطريقة معاكسة للتاريخ، حزب عاد جا كيقول بأنه باغي بقاء الاحزاب الوطنية وتكون عندها مرتبة، في حين راه هو الحزب اللي تسبب في نهاية احزاب صغيرة”.
وهاجم الازمي البام وقال بلي “هاد الحزب دار الهيمنة ودا اعضاء ف احزاب الاستقلال والحركة الشعبية ووو وخصهم يرجعو لأحزابهم”.
واردف المصدر نفسه :”الحقيقة الوحيدة هو ان البام يدافع عن نفسه ويدافع عن مقاعده لأنه مبقاش فيديه دار ولد زروال مصدقاتش ودار زنقة زنقة صوتو على البام مشداتش، بل دارو القاسم الانتخابي باش يبقاو لأنهم غاينذثرو”.
وتابع الازمي :”اللي كيتحملو المسؤولية هم الاحزاب اللي صوتو “.
ووصف الازمي ليلة التصويت على القاسم الانتخابي بأنه “ليلة حزينة وليلة تاريخية بالمعنى السلبي وليلة التواطؤ ضد الاختيار الديمقراطي “.
وأضاف المتحدث :”هذا خطأ تاريخي جسيم، والقاسم الجديد كيحسب اللي صوتو واللي مصوتوش الاحياء والاموات ، وهذا فيه تشجيع الكسلاء وصعود عدد كبير من الاحزاب، وندوخو المواطن، باش نقولو ولاد عبد الواحد كلهم واحد”.
