سهام البارودي – كود//

اللقاحات من ابرز الانجازات ديال الطب الحديث ! و بفضل اللقاح باش اليوم بزاف ديال الناس ماكايموتوش بأمراض فحال بوحمرون و السل و الكزاز … و ماكانشوفوش بزاف د الوليدات كايعانيو من شلل الاطفال ! و اليوم لاكان امد الحياة د الانسان فالكرة الارضية عامة تزاد و فالمغرب خاصة ! و لاقلالو عدد وفايات الاطفال راه هادشي راجع بشكل كبير للقاحات ! ( و عوامل اخرى فحال توفر الماء الصالح للشرب و و و …)

بالعربية تاعرابت ! لهلا يخطي علينا اللقاح آ سي ! كورا خرانا مايجمعوه شراوط و كوراه مازال لدابا ضربك غي حديدة مصدية لرجلك تموت ! و لكن شكون سمعك ؟! هاد الوقت وقت ديال la pseudo-science ! ماعرفتش كيفاش نترجمها للعربية ولكن لي بغيت نقول هوا هاد الوقت لي حنا فيه كاين العلم و العلماء فجيهة و كاينين جيوش ديال “اشباه العلماء” و التابعين ديالهم كايروجو ل”شبه علم” ! صحاب الكرة الارضية مسطحة ! و الانسان مامشاش للقمر و كورونا غي مؤامرة دايرها بيلگايتس و رباعتو باش يسيطرو على العالم ! هادو هوما نفسهم لي كايروجو لفكرة رفض اللقاح و لي لقات صدى عند بزاف د الناس لي مبرمجين باش يتيقو بفحال هاد الاخبار

اغلب لي كايروجو لرفض اللقاح غي المكلخين ! لي ماعمرهم هزو صبعهم فالقسم ! دوك لي كايستامدو الثقافة ديالهم من الفيديوات ديال المؤامرة لي كاينين فاليوتوب و لي كايعطيوهم احساس انهم عايقين اكثر من الاخرين و عارفين اكثر من الاخرين ! اغلب الرافضين للفاكسان من هادوك لي عندهم نص معرفة ! نص معرفة بالكورة و كايحلو زكهم ! نص معرفة بالطب و كايحلو زكهم ! نص معرفة بالاقتصاد و كايحلو زكهم ! كايحلو زكهم باش يهضرو فكلشي و كايفهمو فكلشي و هوما ماكايفهمو و ماكايتعمقو فتاخرية !

البارح فواحد الگروب نسائي كايناقشو واش اذا المغرب وفر اللقاح واش غايديروه ؟ و بزاف د العيالات كايقولو لا ! لا حيت تفرجات فواحد ليميسيو على ناس دارو لقاح ايبولا و مرضو ! لا حيت ماكاتيقش فلقاح شينوي ( يصحابها سبرديلا ايميطاسيو غاتخناز ليها ) مافراسهاش راه اللقاح كايخضع لمعايير دقيقة و تجارب قبل مايتعرض فالسوق ! و لي قالت ليك لا حيت واحد الطبيب بلجيكي كايعرف بنت خالتها لي ساكنة فبلجيكا قاليهم واياكم ديرو اللقاح راه مامزيانش ! هادشي بالاضافة لتداول شي تصاور ديال هادا راسو عوج ! هذا بنادم عندو راس حمار و الفوق كاتبين ” المغاربة مورا ماياخدو اللقاح ” فحالا حنا محتاجين اللقاح مغشوش باش نضبعو !

بنادم كايروج للكالاخ و الجهل و الافكار الخاطئة و لي للاسف كاتلقى صدى عند عباد الله لي باش يفهمو الميكانيزمات ديال اشتغال اللقاح غاتجيهم صعيبة ولكن فاش غاتقوليهم راه دايرين فيه شي مادة غاتخليك ماتقيمش ! هادي زوينة غاتعجبو و غايعقل عليها و غايهز صندالتو و يمشي يجري يوصلها لقهوة الحومة !

انا بعدا غي يتوفر اللقاح غانديرو !