يونس أفطيط – كود///

[email protected]

تفاجئ 12 مهاجر مغربي بأمر النيابة العامة، يوم أمس الاربعاء بوضعهم تحت الحراسة النظرية، عقب إحتجاجهم على التعامل الذي يلقونه من شركة “جي إن ڤي” للنقل البحري.

وحسب مصدر “گود”، هاد المهاجرين كيخدمو فالنقل الدولي للبضائع، ولبارح كانوا جايين لكن الباطو ديال “جي إن ڤي” تعطل ثمان ساعات، هادشي لي خلاهم يمشيو عند قبطان السفينة ويبلغوه احتجاجهم، ويطالبوه بالتعويض عن التأخير لي كاين فالقانون ديال شركات النقل الدولي، وهادشي خلا القبطان يسبهم ويوصفهم بلمغاربة الحيوانات.

التصعيد كان فالحين، ولمغاربة شعلوها مع طاقم السفينة، وملي وصل لباطو لميناء بني أنصار بالناظور، بداو كيحتجو فالميناء، هادشي لي خلا إدارة الشركة تصيفط لي يتفاهم معاهم، لكن السلطات المغربية كان عندها رأي آخر، حيث حضرت الشرطة القضائية وقامت بنقلهم لمقرها، وبعد التحقيق أمر وكيل الملك بوضعهم تحت الحراسة النظرية.

المعتقلين كانو كيتشكاو ماشي غير من التأخر ولكن حتى من الحالة الكارثية ديال السفينة، وهاد التشكي ديالهم جابليهم الربحة، الشيء لي خلف صدمة لدى الاتحاد المغربي للشغل لي كينتاميو ليه المعتقلين.