هناء ابو علي كود كازا ///
دابا كلشي غريب عجيب فمطاعم برادة الطاشرون مول بالموري اللي كاينة فالعنق فكازا. جات لجنة هادي كثر من اسبوع ووقفات على خروقات منها ان “او بيري” بار ماشي مطعم. كاين فيديو يوثق هاد الشي. التباعد ما كانش. فهاد ليام البارات ديال شعيبة ممنوعين بقرار من الدولة٬ يعني ممنوع ترجع ريسطو بار. كل مكان عندو قوانين خاصة بيه فقضية المشروبات الروحية اللي كيأطرها مرسوم صادر على مدير ديوان الحسن الثاني ف1967.
وفق مصادر “كود” فقد اسفرت الاجتماعات الاولى لمسؤولي الامن اللي عندهم هاد الملف بسحب رخصة المشروبات الروحية لمدة 6 اشهر. واخا مطاعم دارت قل من اللي دار الطاشرون مول بالموري راجل طاطا مرجانة وخداو عام. ولكن وفق مصدر “كود” هاد القرار خاصو يدوز على والي جهة الدار البيضاء الكبرى قبل ما يكمل طريقو. هنا باقي حاصل. فالسابق ملفات بحال هادا كيدوزو بسرعة.
المشكلة ماشي فوالي الجهة ولكن فالتدخلات لكبيرة بزاف اللي كتمارس باش ما يتمش اتخاذ هاد القرار.
دابا مطاعم ملايرية فكازا كلهم عاقبوهم وتقصحو وسكتو وهادا باغي يكون استثناء. هاد الشي شوهة للدولة اولا عاد لهادو اللي كيدافعو عليه.
