اسماء غربي – كود//

هاد الاسلاميين كيستناو اي فاجعة كتتمس المسلمين كيردوها قضية باش يعاودو يحياو بها، حيث مولفين كيحياو بالأزمات وبالدم، والمظلومية والبكائية، وكل صراع وحادث ارهابي لي الانسانية كاملة ضدو، هوما كيردوه حرب عقائدية، هادشي باين من تصريح احمد الريسوني، منظر الحركات الاسلامية في المغرب، ورئيس الاتحاد العام لعلماء المسلمين، لقناة الجزيرة وقال فيه بلي روح جديدة ديال الصليبية تنبعث من جديد وحمل مسؤولية ما حدث في نيوزيلاندا للغرب.

فيديو اخر تنشر فالفايسبوك لقيادي فالعدل والاحسان اسمه بنجلون وكان فعشرين فبراير، كيهضر فيه بعد صلاة الجمعة، كيقول فيها :” لو كنا دولة اسلامية ديال بصح كان من المفروض نصليو صلاة الغائب على 30 ماتو ف نيوزيلاندا”، هاد جبد الصهيونية ودماء المسلمين، وكيهضر ف زنقة ويقول خصنا ندعيو مع الشهداء، هادو راه ولاو بديل عن مؤسسات الدولة.

ياك الملك هو امير المؤمنين، وقدم تعزية باسم الشعب المغربي، اش دخلك نتا وجماعتك فهادشي، ولا غير كتسناو فرصة تركبو على اي حدث اجرامي.

من جانب اخر، قال نجيب البقالي برلماني في حزب العدالة والتنمية عن دائرة المحمدية لي ترشح فيها رئيس الحكومة سعد الدين العثماني ، :”الرقص والغناء ف يوم استشهاد حوالي 50 مسلم.. شي حاجة ماشي هي هاديك فهاد البلاد”، مهاجما قناة الاولى، واش هذا باغي يدير امارة المسلمين فهاد البلاد، راه هاديك قناة عمومية وعندها برنامج ملتزمة به، والا جات تبقا دير القرآن راه غاتبقا ديرو 24 ساعة على 24 ساعة، ناس كيموتو يوميا ف سوريا وفلسطين وفالصين وباقي دول العالم.

ثم هاد الاعلام العمومي راه تابع لرئيس الحكومة لي من حزب ديالكم اسي البقالي.

هاد الاسلاميين فيما كانت شي حاجة فيها دم وضحيتها مسلم، كيقولو الغرب داير حملة صليبية وكيتعدا على المسلمين حيث مولفين خطاب المظلومية.