مصطفى الشاذلي – كود سبور//

جوسيب بارتوميو، رئيس برشلونة الإسباني، جا الرباط البارح وبالضبط لحسان وهاز معاه بزاف ديال الملفات.
جوسيب بارتوميو جا بلا بروتوكول ودخل لإحدى الإدارات كأيها الناس بلا بهرجة أو تجمهر.

أشخاص قلال تعرفوا عليه وطلبوا منو سيلفيات، وما ترددش في الاستجابة ليهم، كباقي الشخصيات العمومية والمشاهير.

كاين لي طلب منو تصويرة وكاين لي عبرلو على حبه الكبير للبارصا، وحدين أخرين سولوه على ميسي ونيمار، وهاد الرئيس المعروف بالتواضع ديالو لبى طلبات كاع لعشاق الفريق الكتالوني. ومن بعد دخل بزربة لواحد الإدارة فحسان.

هناك من قال إن جوسيب بارتوميو جا باش يدرس ملف إحداث أكاديمية كبيرة فالرباط تابعة لبرشلونة الإسباني، والبعض الأخر أكد أنه جا على “ليزافير” ديالو.

وحسب مصدر “كود”، فإن جوسيب بارتوميو رجع في نفس النهار لإسبانيا.

الأشخاص لي خداو تصاور معاه فرحانين بزاف، وعجبهم التواضع ديالو، وهادشي ماشي غريب على رؤساء الأندية العملاقة المعروفين بالتواضع ديالهم، حتا فلرونتينو بريز، رئيس ريال مدريد متواضع بزاف مع الفانز ديال الفريق الملكي.