عمر المزين كود – الرباط//
الأمين العام لحزب الأصالة والمعاصرة، حكيم بنشماش، قدم بشكل رسمي استقالته من حزب الجرار. هاد الشي اكدو ل”كود” واحد من اكبر داعم ليه فالحزب. ووفق هاد القيادي عضو المكتب السياسي ل”كود” فان الداخلية تدخلت فالشؤون الداخلية للحزب.
كيف هاد التدخل؟ القيادي وضح فتصريحو ل”كود” اللي كنحتافظو بتسجيلو كاملا ” كنرفضو التدخل السافر فشؤوننا والضغط على مجموعة من البرلمانيين” كثر من هادا قال ليك باللي العربي لمحارشي استاقل حقاش هددوه. وهادي جديدة. شكون هددو وعلاش لمحارشي براسو ما قالهاش
وأضاف المتحدث ل”كود”: “بنشماش بلغ رسالة سياسية واضحة وكولشي غادي يقدم الاستقالة ديالو بشكل جماعي، وحنا مستعدين نمشيو بعيد معاه وغادي نوجهو ملتمس للملك فهادشي”.
المسؤول ما شرحش بالتفاصيل اشنو هاد التدخل وكيفاش وقع.
القضية معروضة على القضاء وهو اللي غادي يوضح لينا شكون اللي معاه القانون وشكون اللي خالفو.
“كود” اتاصلات بالداخلية باش ترد وقال مصدر ل”كود” اللي كيتاهم يقول لينا شكون هو باش نعرفو نردو عليه.
قيادي فتيار المستقبل التابع للبام اكد ل”كود” باللي هاد الشي غير تخربيق. واضاف ل”كود” “حنا دولة المؤسسات. ايلى وقعات شي حاجة كاين القضاء، والقضية معروضة عليه وخاصنا نحتارموه بلا مزايدة” المصدر ختم ل”كود” “هاد السي حكيم طرد نص الحزب وحال بزاف على مجلس تأديبي وجاي كيبكي هو وصحابو اليوم”.
