عفراء علوي محمدي- كود//

أجلات محكمة الاستئناف فالرباط، اليوم الأربعاء، محاكمة المحامي ميلود عبوز، حتى ل8 يوليوز 2020.

وبمجرد انطلاق الجلسة الثانية ديال محاكمة عبوز استئنافيا، بعدما كان تدان ابتدائيا بشهرين دالحبس النافذ، بتهم”السب والقذف العلني في حق امرأة بسبب جنسها” و”التحريض على الكراهية والإساءة للدين الإسلامي”، و”سب مسؤولين والمس بمؤسساتهم الدستورية”، جاو المحامين يحتجو فبهو المحكمة، ويساندو الزميل ديالهم فالمحنة ديالو.

وواخا الداخلية مانعة التجمعات بسبب فيروس كورونا المستجد، تجمهرو مئات المحامين، وللمرة الثانية، باش يأكدو فاحتجاجهم بللي مسطرة متابعة زميلهم شابتها مجموعة من الخروقات، بحيت “تحرم من التخابر من دفاعو”، و”هيئة الحكم ماتعاملاتش بحياد مع القضية”، وفق تعبيرهم.

ومن المتوقع عبوز يغادر أسوار السجن نهار الجمعة 22 ماي، من بعد ما كمل عقوبتو السجنية، بحكم انه كان توقف ف23 مارس اللي فات.

وغير الخميس اللي فات، حكمات المحكمة الابتدائية بالخميسات على عبوز بشهرين دالحبس النافذ، بعد اعتقاله لمدة كتجاوز شهر فسجن تيفلت.

واستنكرو رواد مواقع التواصل الاجتماعي إدانة عبوز ابتدائيا بسبب تدوينات، وقالو بللي هذا “استهداف لحرية التعبير”.