كريم الصوفي – كود//
قال موقع “لا بوث دي غاليثيا”، أن محاكمة المتورطين ف عملية الدجاجة اللي عرفات استغلال مئات المهاجرين المغاربة غادي تبدا الاربعاء الجاية قدام محكمة لوگو الإقليمية اللي غادي تعرف تأكيد موافقة مكتب المدعي العام على لائحة الاتهامات، بعد اتفاق بين الأطراف على أحكام بالسجن لمدة أقصاها سنتان للمتهمين السبعة عشر، بعد تحرير 15000 صفحة وما يقرب من 16 عاما من الإجراءات القضائية.
ويتعلق الأمر بعملية أمنية فرشات استغلال 500 مهاجر من طرف شبكة كيتزعمها مغربي، حيث وقعت الأحداث بين عامي 2006 و2008، تم استغلالهم بشكل غير انساني ف الفيرمات ديال تربية الدواجن ف منطقة غاليثيا، حيث عانى الضحايا من العيش ف ظروف أشبه بالعبودية وتحرمو من أبسط الوسائل والحقوق، بحال النظافة والظروف الصحية.
وأضاف الموقع ذاته، أن المتهم الرئيسي نسق مع شركة ف بونفيرادا، واللي تعاقدات بشكل وهمي مع العمال المغاربة اللي لقاو راسهم عايشين في ظروف غير لائقة وكيخدمو يوميا حتا 14 أو 15 ساعة يوميا، بحسب النيابة، واللي غادي يتحكم لفائدتهم بتعويضات مالية.
