كود كازا ///

المغرب حين لائحة “أ” و”ب” للدول اللي ممكن ليهم يجيو عندها. لكن اللي كان مثير هو انتقال اسبانيا وفرنسا والبرتغال من اللائحة “أ” الى اللائحة “ب”.

انتقال طبيعي حقاش الحالة الوبائية فهاد الدول تخربقات. حالات “الكوفيد” كثرات ونسبة المتحور “دلطا” فهاد الحالات رتافع. ماشي غير المغرب اللي حذر من هاد الدول٬ ففرنسا مثلا حذرات ناسها باش ما يزورش اسبانيا والبرتغال ودول اوربية اخرى زادت عليهم حتى فرانسا.

انضمام هاد الثلاثي منطقي من ناحية الوضعية الوبائية. طبعا اللي باغي يدخل دابا خاصو يدير تيست “بي سي ار” عمرو 48 ساعة ويدوز 10 ايام فلوطيل. اما ايلى كان داگ ڤاكسان معترف بيه فالمغرب٬ راه يحتاج غير ل”بي سي ار” نيگاتيف طبعا.

دابا الناس اللي كانو يفكرو يزورو المغرب من هاد الدول خاصهم يتسناو 15 يوم باش يتم تحيين اللائحتين. اكيد ايلى بقات الوضعية كيف هي فهاد الدول٬ راهم غاديين يبقاو ف”بي”.