الرئيسية > تبركيك > اذا بغيتي تحس براسك مفشش فالمغرب قطع بروميير كلاص فالتيجيفي وسافر فيه من غير الويكاند والأعياد.. وغادي تحس بالحنان ديال الأم والفشوش ديال جدة والمعقول ديال عمك
21/05/2022 15:00 تبركيك

اذا بغيتي تحس براسك مفشش فالمغرب قطع بروميير كلاص فالتيجيفي وسافر فيه من غير الويكاند والأعياد.. وغادي تحس بالحنان ديال الأم والفشوش ديال جدة والمعقول ديال عمك

اذا بغيتي تحس براسك مفشش فالمغرب قطع بروميير كلاص فالتيجيفي وسافر فيه من غير الويكاند والأعياد.. وغادي تحس بالحنان ديال الأم والفشوش ديال جدة والمعقول ديال عمك

سعيد الحسوني – كود//

التيجيفي هي الحاجة الوحيدة فالمغرب اللي معقولة ديال بصاح وعندها الكلمة ماتنزلش الأرض، هو الوحيد فالمغرب اللي كيمشي فالوقت ويجي فالوقت ديما، وهو الوحيد اللي ديما منظم ونقي وهادئ خاصة بعيدا عن أوقات الذروة..

البروميير كلاص ديال التيجيفي كتخليك تحس أنك إنسان محتاج ديما للفشوش والطبطبة والاهتمام والعناية والاحترام، هي كتديرلك هادشي كلو..

أول حاجة الكوسانات ديما نقيين ومتسعين عندك فين تطلق رجلك بلا ماتعفط على اللي قبالتك بحال اللي كيوقع فالدوزيام ديال نفس التران، زيد عليك لا كليم ديما خدامة والريدوات ديال السراجم خدامين معمري لقيت شي واحد فيهم مكوانسي.

ثاني حاجة الطواليطات ديال البروميير كلاص نقيين بزاف وديما فيهم بابيي جينيك والصابون والمراية ديما ممسوحة واخا كيتعطلو معاها العيالات لكن ماعليش حنا كنهدرو دابا غير على التران ماشي على الركاب.

ثالث حاجة البريز ديال الضو باش تشارجي اللي بغيتي كاين فالكوسانات كاملين باش تبقى ديما مكونيكطي وما يجيكش القلق ديال الشارج غدي يسالي، ناس كيفكرو فيك ومابغاوكش تتقلق لأتفه الأسباب.

من بعد أسيدي كتجبر المعاملة الحسنة ديال المستخدمين كيجيوا يهدرو معاك بالصواب والابتسامة، ومكيجيبوش الشراف نو، كيجيوا غير الشباب لابسين مزيان ومحددين سراولهوم دراري وبنات، خاصة العيالات جات معاهم اللبسة.

وحتى هادوك اللي فالباب ديال التران كيعاملوك باحترام ويهزو معاك الصاك واخا لابسين الكوستيم وكيعاونوا الشيوخ والعجزة ويهزو الكروصة ديال البيبي والصواب والابتسامة من لفوق، المهم القمة فالإنسانية..

نجيوا دابا لأهم حاجة اللي كتفشش الركاب ديال البرومييم كلاص وهي الصالون ديال الانتظار ديالهوم، مديور ليهم بوحدهوم ومعزول على اللخرين، معزول النيت حيث عندو الباب وكاينة المراقبة فيه خصك توري ورقتك ويقيدوك عندهوم عاد تدخل، وملي كتجلس فيه كتلقا الكالم والراحة وكل واحد داخل سوق راسو بحال تقول هذا ماشي مغريب…!

لكن ملي كتدخل كتبرع ومكتسخاش تخرج منو، عندوم القهوة فابور وحتى الماء المعدني واتاي والعصير المعلب، شرب شحال ما بغيتي ديال نيسبريسو ماكاينش اللي يدوي معاك، والفوتويات كبار وعراض فيهم البريز ديال الضو وفّيوز والجلسة فيهم أمبّيكابل كتحس براسك قايد ديال الستينات.

والقاعة فيها طواليطات خاصين بيها نقيين بزاف على اللخرين وفيهم ديك اللعيبة د الصابون ديما عامرة مكتخواش وحتى بابيي موجود ديما ولافام دو ميناج غادا جايا كتنقي فيه واخا الناس قلال وأصلا نقيين مكيخليوش الوسخ وراهم.

وحتى الإضاءة اللي فالقاعة هادئة وغير مزعجة كتعطيك إحساس بالراحة، والزاج اللي داير بالقاعة كلو مزوق باش مايبانولكش لوخرين أو ماتبانليهومش نتا، اللي بغيتي..

وملي كيقرب وقت التران كيجيوا عندك يفكروك باحترام وأدب عندك تكون نسيتي ويمشي عليك التران، حيث عارفين ظروف الراحة اللي موفرين لك فاللونج ديال البراق تقدر تنسيك فالساعة وفالتران وفالغرض فين غادي.

موضوعات أخرى

28/03/2024 17:00

واش هيرفي رونار كيضغط على الركراكي باش ياخد بلاصتو؟ الفرنسي جاهم من اللخر: باغي نلعب مونديال 2026

28/03/2024 16:30

خبير صبليوني لجورنال “أ. ب. ث”: المغرب دولة ذات سيادة وقادرة تدير مناورات بحرية فين ما بغات من مياهها الإقليمية والوقت اللي يناسبها بلا إذن شي طرف خارجي

28/03/2024 16:20

رقم معاملات “لوسيبي” وصل لـ91,27 مليار درهم فعام 2023 وخا كان انخفاض كبير فأسعار المنتجات الفوسفاطية

28/03/2024 15:30

بوليس سيدي قاسم شدو 4 فيهم واحد قاصر بانو ف فيديو هازين السيوفا وكيسبو فمؤسسات وموظفين عموميين وكيحرضو على تنفيذ اعتداءات

28/03/2024 15:20

الريح قوية مع الغبارية .. وزارة التجهيز: الشيافر فهاد المدن يردو بالهوم مزيان فالطريق

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة