كود هند لكلاوي مراكش ///

البارح علن عزيز اخنوش رئيس الحكومة المكلف بتشكيلها على تحالفو الثلاثي اللي كيجمع حزبو التجمع الوطني للاحرار الفائز بالانتخابات والاصالة والمعاصرة اللي خسرات للمرة الثانية الانتخابات وجات الثانية ثم حزب الاستقلال اللي جا الثالث. هاد التحالف غادي يضمن للحكومة اغلبية مريحة باكثر من 270 عضو فمجلس النواب من اصل 395.

اخنوش قال فنفس اللقاء الصحافي باللي عندو 3 شروط لاختيار وزراء حكومتو: “الكفاءة” و”المصداقية” و”الامانة”. قبل كان اكد على ان وزراء حزبو غادي يكون فيهم الشباب.

وفق تحالف الاغلبية فان الحكومة الجاية خاصها تكون كوموندو حقيقي كيخدم ليه ونهار وكاع اعضاء هاد الكوموندو خاصهم يكونو قادين بكفاءتهم وقادين حتى بصحتهم باش يخدمو بزاف.

حسب مصدر من هاد التحالف ل”كود” فان التوجه العام ان الحكومة غادية تكون فحدود 23 وزير. طبعا هاد الشي كيتحكم فيه بالاساس رئيس الحكومة. حقاش عندو صلة بالبرنامج الحكومي والهيكلة اللي ممكن تخرج من هاد البرنامج٬ لكن كلمات مكونات الاغلبية كلها مع حكومة مجموعة باش تحقق الانسجام والفعالية اللي كيقلبو عليها لمغاربة واللي وعد بها اخنوش.