كريم الشركي – كود //
نايضة فـ منطقة “سكاربيك” (Schaerbeek) بالعاصمة البلجيكية بروكسيل، على شاب عشريني مغربي مات فيد البوليس قبل أيام، كانو اعتاقلوه فالشارع العام بعدما بدا كايهرس فالطوموبيلات اللي واقفة فالشارع.
عائلة الشاب، اللي سميتو منير و فعمرو 26 عام ، اتاهمات البوليس أنهم هوما اللي قتلوا ليها ولدها، مؤكدة أن الطب الشرعي بين فـ تقريرو أنه كاين آثار عنف على جسد الضحية، لكن فـ المقابل البوليس كاينفيو هاد الاتهامات وكيأكدو أن الضحية مات بسباب سكتة قلبية.
المدعي العام البلجيكي، فتح تحقيق فالقضية باش يعرفو كيفاش مات الشاب المغربي، وقال الناطق بإسمه، أن الشهود كايقولو بأن الهالك كان كايهرس فـ طوموبيل وناضو الجيران بلغو البوليس، وملي جاو، الشاب جاتو كريز وتم نقلو ف أومبيلونص للصبيطار، اللي مات فيه بعد وصولو.
