ف بيان مشترك نشرو البيت الأبيض.. المريكان و17 دولة اخرى كيطالبو بالإفراج الفوري على كاع الرهائن للي ف غزة
محمد سقراط-كود///
بنكيران السياسي الوحيد فالمغرب لي والابد يكون عندك موقف منو ، كتافق معاه أو ضدو كتحتارمو أو تحتاقرو كتبغيه أو تكرهو، المهم مايمكنش تكون سلبي إتجاهه، على خلاف السياسيين لخريين لي بزاف منهم المغاربة إما مكيعرفوهمش أو معندهم حتى موقف منهم، وهادي هي قوة بنكيران أنه مرئي أكثر من لخريين، يقدرو لخريين يديرو مؤتمرات وندوات وخطابات ويخصرو عليها الفلوس الصحيحة باش يسوقوها ويالله غادي توصل خبارها عند المهتمين، بينما بنكيران يكفي يمشي يتغدى بالطاجين فالرماني أو يشري سروال قندريسي فباب الجامع، أو يضرب دورة فجامع لفنا حتى يولي الأمر خبر ومادة وموقف ورسالة، وفين مامشا غادي يلقى ناس معندهمش معاه وفنفس الوقت غادي يلقى ناس بزاف كيحماقو عليه وعندهم عزيز وسواء كان التقاعد ديالو فيه سبعة ديال المليون أو تسعود مكيتغير والو، بنكيران كيسبوه شوية فالفايس كيسلمو عليه ويتصورو معاه بزاف فالواقع، هذا هو بنكيران.
وفالوقت لي السياسيين لخريين محتاجين مواقع ناطقة بسميتهم وتغطية إعلامية وفريق تواصل، بنكيران محتاج غير فريد تيتي شيفور ديالو ومصور وذراع إعلامي كينافس المواقع لكبيرة، وممحتاج لا ماتاريال إحترافي ولا مصورين خاصين غير ببورطابل ولايف على صفحة شخصية وغادي تلقى كاع المواقع والصفحات كيجريو باش ياخدو المادة ويروجوها، حيت بنكيران علامة تجارية فالسوق وأي حاجة ديالو غادي تمشى وتلقى الراواج، هاد السحر والحضور والبساطة وهاد الخرجات لي تقدر تكون عفوية ولكن عندها أثر سياسي، وفيها رسالة بلي أن بنكيران باقي منساوهش المغاربة وباقين كيحتارموه وكيبغيوه وباقا عندو شعبية حقيقية فالواقع وماشي فالإفتراضي.
إلى كانت شي خسارة حقيقية عاشها المغرب سياسيا مؤخرا فراه هي إبتعاد بنكيران، حيت السيد مدة الصلاحية ديالو باقا بعيدة باش تسالى ، والشعبية ديالو صعيب أنها تنقص بسباب حملات التشويه الفايسبوكية، وحاليا وهو مكيدير والو وكالس غير فالدار وعاطي مسافة ، فراه باقي كيدير السياسة وباقي كيأثر فيها فالمغرب، إلى مشا غير للسوق فراه الامر كيولي خبر، وكل مرة جابدينو الخصوم ديالو فشي حملة تشويه لي كيكون عندها أثر عكسي فالغالب، وكتحول لحملة تضامن معاه، هذا هو بنكيران لي كيبين كل مرة للخصوم ديالو أنه قوي بحب الناس ليه.