عن الصباح//

قتلات مرا عشرينية راجلها اللي فعمرو 37 عام، بجماعة الشراط إقليم بنسليمان، باستعمال المهراز، بحيث بدات كتضرب فيه بيه للراس وجميع أنحاء جسدو حتى تسببات ليه فكسور وجروح خطيرة، توفى بسبابها فالمستشفى الإقليمي مولاي عبد الله بالمحمدية.

وحسب “الصباح”، عناصر الشرطة القضائية والمركز الترابي بسرية درك بوزنيقة، مشاو لمسرح الجريمة، ولقاو الضحية مليوح قدام دارو  بدوار العكيان، ومغيب، وهكذا تهز للمستعجلات بالمركز الصحي ببوزنيقة، ومن بعد تحول لسبيطار مولاي عبد الله بالمحمدية، وتماك توفى.

وفاللول زوجة الضحية ماعتارفاتش بالفعلة، وقالت فتصريحات متضاربة أن مجهولين هوما اللي قتلوه قدام باب دارو، لكن منين شكو فيها وشدوها، نهار الأحد اللي فات، وحاصروها بالأسئلة اعترفات، وتوضعات فالحراسة النظرية من اجل تعميق البحث معاها.

وقالت مرات الضحية، اللي والدة معاه وليد عندو 5 سنين، أن راجلها مولف يجي للدار سكران، وكيتعدى عليها جنسيا، وهو متابع من طرف النيابة العامة ماشي مرة ماشي جوج بتهمة السكر العلني.

وقالت أن آخر مرة جا فيها تاني سكران، بغا يتعدى عليها من بعد ما عايراتو بهذشي، وهربات وتبعها للكوزينة، وهو يطيح، واستغلات بهذشي الفرصة وضرباتو بالمهراز باش تدافع على راسها، وخرجاتو لباب دارو وعيطات للجدارمية كيف كتقول.

ومن المنتظر تحال الزوجة على الوكيل العام بمحكمة الاستئناف بكازا بتهمة الضرب والجرح المفضيين إلى الموت دون نية إحداثه.