المغرب: كنرفضو إقتحام المسجد الاقصى وقيام دولة فلسطينية هو اللي غادي يساهم فإحلال السلام
محمد سقراط-كود///
واش الدولة كتضحك علينا ولا كيفاش، حلات البلاد ومعولة على السياحة والرواج وفي نفس الوقت خاص الواحد الى بغا يدخل للمغرب يدير البي سي آر بثمن تلات أيام مبيت فشي فندق في المغرب، ولد خالتي ملقح تلاتة ديال المرات مشا سياحة لنكليز تسارى ودار مع راسو، نهار كان داخل سولوه واش ملقح ومرحبا ومن بعد مابقى سولو حد، نهار بغا يرجع للمغرب جابلو الله راه بحال بحال، وجمع حوايجو وشد الطريق للمطار وفاش وصل قالوليه خاصك بي سي آر إلى بغيتي تطلع للطيارة لي غادا للمغرب، حيت بلادكم هادشي لي طالبة الى بغيتي تدخل ليها، من البلدان القليلة في العالم لي طالبة هادشي وحتى هو داخل إما في الأستثناء المغربي أو في الغباء ديال المسؤولين، صدق ولد خالتي راجع من المطار بما هي وما لونها، وشد الموعد حيت كولشي كيتدار عبر الأنترنيت وخلص واحد 1600 درهم مغربية، وزاد ليلة خرى ديال لمباتة وتيكيت آخر، تعنكيشة عالمية باش ترجع تدخل لبلادك، وحيت هو واخا فعايلو ديال النصارة فراه كيبقى مغربي وخاصو يرجع لدارو وخدمتو وولاد وبنات خالتو ، فمكانش عندو خيار ومشا دار هادشي كامل.
دابا تخايلو أن السائح الأجنبي لي عندو وجهات عديدة عالمية منافسة للمغرب، خاصو بالإظافة للحجز ديال مكان الإقامة ومصاريف التنقل غادي تزاد عليه 1600 درهم ديال بي سي آر، هاد الثمن مضروب في جوج راه رحلة سياحية ديال سيمانة في بلدان منافسة للمغرب وأرخص منه وأكثر تنظيما وإحتراما لمواطنيها وللسياح وأكثر حرية، وهادشي أصلا كيحرم صحاب لوطيلات وعموما الإقتصاد المغربي من واحد المقدار ديال الفلوس كان غادي يخسرهم السائح في البلاد كيولي كخلصهم بي سي آر في البلاد ديالو ممستافد منها المغرب والو فقط لحماية الشعب من كورونا زعمة هاد الفيروس لي عمر المغاربة ماتسوقوا ليه أصلا، واخا فيروس قاتل ولكن كي العادة لي مات راه الله بغاه داه، ولي بقا حي راه داز ليه من حدا جدارة الوذن وهاكا غادا الأمور.
ولكن الدولة ديما عندها رأي آخر بخصوص الخوف المرضي والمبالغ فيه على صحة المغاربة، كتدير قرارات لي كتضر قطاعات معينة بحال السياحة نيت وفي نفس الوقت كتنوض تدعم هاد القطاعات بملايير دافعي الضرائب رغم قلتهم، أفضل دعم غادي تقدموا الدولة لقطاع السياحة هو تلغي كاع القيود لي مديورة على الأجانب ديال كورونا لدخول المغرب، وتطلق الدنيا لي بغا يدخل مرحبا بيه وراه كورونا أهون على المغاربة من الحزقة والأزمة وقلة شي والغلاء الفاحش في أيتها حاجة إستهلاكية من قرعة ديال الزيت حتى للعقار مرورا بعدة منتوجات أخرى، الوقت واقفة والناس شادين فلوسها عندها وشي كيشوف فشي، والأزمة حقا عالمية ولكن يمكن للدولة تخفيفها على الأقل على بعض القطاعات برفع القيود نهائيا على لي باغي يدخل للمغرب.