كود ألمانيا ///

رد عزيز أخنوش على رئيس الحكومة سعد الدين العثماني، لم يتأخر. رئيس التجمع الوطني للأحرار جاوب بقوة على داكشي اللي قال العثماني فلقاء شبيبة الحزب بألمانيا.

أخنوش  قال ” أتوجه للسي سعد الدين العثماني، هو خدا الكلمة البارح، ولأول مرة كيتهكم على حزب بشكل صريح، لأنه قال بأنه كاين شي حزب بغا يدخل الشباب وحنا اللي دخلناه ماشي هوما، وهو قصدنا بشكل واضح ماشي شي حزب اخر، لأننا الحزب الوحيد اللي تكلم على هاد الموضوع فأكادير”.

أخنوش قال بللي التجمع الوطني للأحرار شريك ديال البيجيدي فالأغلبية، وكانو معاهم رجال فهاد الأغلبية، وسهلو عليهم المأمورية وتعاونو معاهم.

رئيس التجمع أضاف باللي “رئيس الحكومة خاص يكون كلامو صحيح، فأكادير توجهت للشباب وقلت ليهم ف 2021 غادي يكونو فالحكومة، وعارف اش كنقول، خاصني نوجد الشباب ومنجيش نلوحو للقضايا الكبرى نيشان”.

وتساءل أخنوش وقال باللي شكون هاد الوزير المعين اللي عندو الثقة ديال سيدنا، واش هاد السيد بوحدو اللي عندو الثقة د سيدنا ولا الحكومة كولها؟ خاصو يجاوبنا السي العتماني؟.

وحول توجيهات الملك، قال أخنوش باللي “خطاب سيدنا كان الجمعة وكيقول ما معناه أن الانتخابات باقي بعيدة، وكيقول خلي عليكم الحسابات السياسية الضيقة، لا غد ليه الصباح العثماني كيشوش عليه بلكلمة ديالو “.

وأعاد أخنوش التذكير بأنه معمرو تكلم في حق رئيس الحكومة، وكان مانع على ناس الأحرار يدويو عليه، “وتاهو معمرو جبدنا، واللي جبدنا غيلقانا”.

وحول رحيل الطالبي العلمي وأوجار قال أخنوش بأن “أحسن هدية عطاتنا هاد الحكومة، هي أن الوزراء التجمعيين الخارجين غادي يعكفو على العمل داخل الحزب، وغادي يمشيو مزيان فالعمل فجميع الجهات”.

وبخصوص تسريبات التعديل الحكومي قال أخنوش بأن المجالس أمانات يجب أن تحترم، ومخاصش العثماني يسرب غير اللي بغا للصحافة، “اللي بغا يسرب شي حاجة خاصو يسرب كولشي، وخاصو يقول بلي سيدنا طلب من رئيس الوزراء، الكفاءات الوزارية اللي خاصهوم يبقاو فهاد الحكومة، ويعطينا هاد الأسماء والكفاءات… بديتي كتسرب وخرج كولشي”.

أخنوش ختم الكلمة ديالو برسالة مباشرة “السي العتماني حافض على الأغلبية ديالك”.