كود- وكالات//

علقات وزارة الري المصرية على أخبار خروج تمساح من نهر النيل فمصر، كتقول انه خرج ومشا مسافة برا وعاد رجع للما، وهذشي فقرية ميت المخلص بمركز زفتي فمحافظة الغربية.

وفتصريحات لصحيفة “الوطن”، نفى وكيل الوزارة بالمحافظة، عادل عبد القادر، يكونو التماسيح اصلا كاينة فمركز زفتي، وأكد أن “كل ما تم تداوله إشاعات ماعندهاش أساس من الصحة”.

وتساءل عبد القادر: “كيفاش يقدر يعيش التمساح فبلاصة فيها الما كيوصل غير لمتر ونص؟”

وكان سبق راجت أخبار على وجود تماسيح فالما، وخروج تمساح اللي قالو مشا لمسافة 100 متر ورجع تاني، فقرية ميت المخلص بمركز زفتى بمحافظة الغربية، وهذشي قالوه بعض سكان المنطقة.

هذ الحدث أثار استغراب وخوف السكان، خصوصا وان وجود تمساح فالمنطقة أمر خطير، ورؤية تمساح فمصر حاجة مامتعودينش عليها.