كود سلا//
مرشح جماعة تابريكت-سلا باسم الأحرار احساين أجور دار ندوة وطنية ف عز الحملة الانتخابية، هاد الندوة لي تناقلات تا ف لايف على صفحة نفس المرشح كانت بعنوان “أي أفق لتنزيل الطابع الرسمي للأمازيغية على المستوى الترابي و المحلي؟”.
ف هاد الندوة اللي شارك فيها الباحث أنوار مزروب و الحسين أبليح و أخرون تعهد مرشح الأحرار مع الساكنة بتخصيص مقاطعة تابريكت الى نجح صندوق خاص لتفعيل الأمازيغية و باش يعاود يشوف مشكل تسميات الزناقي لي فيها ريحة “الجاهلية و قريش و الشرق ” لي كتعطا للزناقي و الشوارع ف سلا-تابريكت على حساب رجال و نساء الماروك والتامغربيت، و زاد تعهد بخلق محج سلا-تابريكت على طول شارع بوعبيد لي كايدوز من حي السلام و حدا سوق الصالحين لي تهيكل من جديد بتعليمات من الملك.
يدكر أن نفس مرشح حزب أخنوش لي دار مشروع هيكلة كبير مؤخرا للحمامة ف سلا، دار حتى لقاء تقديم البرنامج المحلي ديال الحمامة ف تابريكت نهار الاربعاء الفايت ، ودوز فيه ميساجات قاصحة للطبقة السياسية والممارسات ديالها.
المرشح أجور قال للصحافة أن السياسة كتبغي أن الأحزاب يتزاحمو على التأطير عوض المزاحمة على اللوائح و المناصب.
المتحدث، لي كيبقى واحد من العلب السوداء ديال الإدارة التربوية هاد 20 سنة الاخيرة والبروفايلات الثقيلة لحزب أخنوش، زاد ف ندوة البرنامج المحلي بأن الجماعات مطالبة باش تنزل ارادة سيدنا ف التنمية والاصلاح، على حد ما قال لـ”كود”.
