سهام البارودي – كود//

وسط هاد الضجة لي واقعة على البنات البلجيكيات لي جاو يديرو خير و رجع ليهم ببومزوي تفكرت واحد السكيتش ديال حنان الفاضلي فاش هضرات على التنظيم ديال كأس العالم فالمغرب و فاش غايخرجو البرازيليات بالشويرطات باش يحتافلو ! ويويو ! غاتنوض الروينة ! السكيتش هزلي و لكن فالمضمون فاش كاتشرفو مزيان كاتلقاه كايعبر على شحال صعيب على واحد الفئة من المغاربة يتعايشو مع الآخر … داك الآخر المختلف لي ماكايشبهش ليهم.

بالنسبة لدوك البنات البلجيكيات لي ناض عليهم الصداع مؤخرا غايرجعو لبلادهم فالقريب العاجل حيت واليديهم تشوشو عليهم و خافو لاطرا ليهم شي حاجة مورا مساقو الخبار لموجة الترهيب لي تعرضو ليه  البنات فالوسائل التواصل الاجتماعي من طرف بعض الاصوليين، بل انه حتى واحد الفهاماطور برلماني تاهوا آ سيدي مالقا فوقاش يخرا الرأي ديالو غا فهاد الوقت و قالك حقا ما حقا خاصهم يلبسو مزيان حيت حگا و الواد خاف عليهم مالابسينش لباس العمل و كدا و خاصهم يلبسوه باش يحميو راسهم فالشانطي و شي دخول و خروج فالهضرة باش من برا يبان راه خايف عليهم و ملداخل كلشي عارف بلي مديرونجيه اللحم لي باين ديال فتيات اغلبهم قاصرات لابسات الشويرطات.

دابا غي بيناتنا ماشي حشومة هادشي ! الناس جايين يديرو خير فالبلاد و العباد و بوگملة بالعقلية القروسطية ديالو مامشا تا رجع ليهم الخير ببومزوي ! سيفطهم لبلاداتهم قبل الوقت و روع واليديهم و حرم على اهالي دوك المناطق الدعم و المشاريع الخيرية لي كانو كايديرو دوك البنات تما ! و وقف الاعمال الخيرية القادمة لي ممكن تكون فالمستقبل حيت الجمعية قررات تحبس المرقة ! و شوه بالمغرب و المغاربة فالجرائد الدولية … و هادشي كلو علاش !؟ على شورط ! بغاهم قاليك مايلبسوش الشورطات واخا هوما جايين من بلاد باردة و خدامين فخمسين درجة الحرارة ! خاصهم يلبسو الجلابة بالنسبة للمعقد المريض الداعشي لي معشش فالدماغ ديال خونا الخراي ! فضيحة عالمية بسباب شنو ؟ شورط !

وا ينعل بو الشورط و لا الگرصون ! وا لي بغا يخدم هاد البلاد و يعاون الفريق مرحبا بيه واخا يجي يخدم عريان ! ملاطي ! و يلبسو غا السترينگات آ سيموحمد ياك غايخدمو ! راكم لابسين الجلالب و الگرافاطات آش قضيتو من غير التخلف و الجهل و الكبت خلا المني غايدفگ ليكم من الودنين ؟  و ينعل بو  ” التقاليد” لي فرعتو لينا بيها راسنا و لي غايعيش فيها الواحد قرون و قرون و غايورث منها غا الزلط و الجوع و العزلة و غايخليوه ديما عايش مغمغم ساد راسو رافض للانفتاح على ثقافات اخرى و هي جاية مادة ليه يد المساعدة ! ينعل بو التقاليد لي باقا حابسة فالقرن جوج قبل الميلاد ! و بالنسبة لدوك لي خايفين من الاجندات لي يمكن يدوزو عبر هاد الاعمال الخيرية ! آ سيدي ينعل بو الاجندات راه بنادم خاصو طريق تربطو بالمدرسة فين يقراو ولادو و السبيطار فين تولد مراتو آشمن آجندات و لا النم ! مرحبا بأي متطوع ! اي جمعية باغا دير الخير فشي قنت من القنات المهجورة فهاد البلاد و لي المواطنين كايحسو براسهم فيها كمواطنين من الدرجة الثانية !

وا هاهوما البلجيكيات مشاو فحالاتهم دابا !

شكون غايكمل ديك الطريق ؟

وا دابا عيطو على دوك الظلاميين لي ديرونجاهم الشورط يهبطو يكملوها !