كود اسماء غربي واحمد الطيب ////

قال يوسف بن جلون، رئيس غرفة الصيد البحري المتوسطي ل”كود” اللي تهمو احمد العمراوي الكاتب العام للمنظمة الديموقراطية للصيد البحري =تابعة المنظمة الديموقراطية للشغل ديال البام= فمناظرة الحسيمة بطنجة باحتكار صيد “التونا الحمرا” ان تلك الاتهامات فارغة. واكد ل”كود” انها “غير فاتورة كنخلصها”. علاش بالسلامة؟ على ما قمت ما به كرئيس غرفة الصيد البحري المتوسطي في ميناء الحسيمة٬ اذ بفضل التعاون مع الجميع وعمل الوزارة الوصية٬ هاد الشي كلو جعله القطاع الوحيد اللي ما فيهش مشاكل اي بلا حراك يشرح ل”كود”.

دابا اجيو نشوفو اش قال هاد النقابي ديال البام على بنجلون ديال البي جي دي وعلى وزير الصيد البحري والفلاحة عزيز اخنوش وعلى ادريوش زكية ديال مكتب الصيد البحري التابعة للوزارة؟

العمراوي فمناظرة نظمتها جهة الحسيمة طنجة تطوان الجمعة الماضية حول الحسيمة بطنجة قال ان هناك مضربات =اللي كتصيد الطون لحمر= وهمية.

السيد قدم معطيات خطيرة بزاف بزاف. ايلى كانت صحيحة ماخاصش غير حراك خاص ثورة فكاع المدن المغربية. السيد قال باللي كاين واحد المستثمر فالقطاع عندو مركب صيد من 2004 وان نفس المركب توسعات رخصتو ديال الصيد ف2014 وتبدلات كاع هاد الرخصة وف2016 باعها لشخص اخر. هاد الشخص وكيقصد بيه يوسف بنجلون عضو حزب العدالة والتنمية في مجلس المستشارين وكانت وزارة الداخلية جبدات اسمو فالبيان الشهير اللي قراوه فالتلفزيون وتخص اكثر من عشر برلمايين = يقول العمراوي استفاد من الريع.

وحسب المتحدث اللي هاز معاه وراق فان الصيد التقليدي والساحلي يالله عندهم الحق ف2015 يصيدو 50 طن من التونا الحمرا بينما صحاب الباركوات =او صحاب المضربات= عندهم 140 طن. والعهدة على نفس المتحدث 3 منهم فالمغرب كلو عندهم 62.53 بالمائة من كوطا هاد الحوت والباقي موزع على كلشي الصيادة.

السيد قال باللي الحسيمة ولات منكوبة فالصيد وحمل وزارة الصيد البحري جزاء من المسؤولية واضاف انه ف2016 مول الباركو اي بنجلون شرا شركة اسمها “هولدينك مونتي باركو” وتعطاتو 112 طن من التونا بينما صحاب الصيد التقليدي والساحلي يالله عندهم 150 طن، واكد ان جوج اشخاص منهم برلماني من الاحرار كيقصد عكاشة وكولونيل متقاعد كل واحد عندو 105 طن للواحد.

العمراوي مشى بعيد باش قال باللي المضربة اللي شرا وكتاخد 112 طن وهمية واضاف انه قبل مقتل محسن فكري نبه باللي الصيد البحري قنبلة موقوتة وانه في عز الحراك 2017 ورغم كلشي شيء٬ تعطي للصيد التقليدي والساحلي فالمغرب كامل 196 طن. اي زادوه بزاف وزادو لنفس الاشخاص =جوج= 120 طن للواحد وغادي ياخد الشخص مول الباركوات بجوج خدا 127 طن. السيد قال باللي 3 الاشخاص كيديو 65.13 بالمائة وباش “نبين ليكم هاد السيد ما عندوش مضربة غادي يخلي حصتو لواحد الشركة اسمها برانسيب” عطاه حصة الكوطا راه كياخد 2 مليار” يتحدث العمراوي بيقينية.
المتدخل هاجم وزير الصيد البحري والفلاحة عزيز اخنوش وقال انه وعد وقال باللي عندو الكلمة وبينو لينا الموظفين ديال الوزارة بان هاديك الكلمة ما بقاتش.

دابا اجيو نشوفو باش ردو الصيادة. اولا خرج بيان موقعينو شي منظمات فالحسيمة كيقول، فالحقيقة ما قال والو. غير باللي العمراوي لا يمثل المهنيين وان رئيس غرفة الصيد البحري المتوسطي وقفات مع الصيادة وباللي كيستنكرو. هاد النوع من البيانات كتزيد تاكد ما قاله العمراوي حقاش فارغة. دابا اجيو نشوفو المعني بالامر بنجلون.

مع “كود” رد على نقطة بنقطة على ما اتهم به. قال بنجلون ل”كود” ان ما قدمه فيه مغالطات واستبعد يكون عندو خلفية سياسية= اي الحرب بين البام والبي جي دي= واكد بنجلون ان الكوطا المخصصة لصيد الطون الاحمر ما كتحددهاش الوزارة كما اشار العمراوي بل المنظمة الدولية للحفاظ على سمك التونا في المحيط الاطلسي واضاف ان المغرب عندو كوطا ديال 2300 طن.

بنجلون اكد ل”كود” على ان توزيع هذه الكمية يخضع لكوطا وماشي سايب اللي بغى يديرشي حاجة يديرها. بنجلون قال ان هناك 18 مضربة فالمغرب للتونا =من قديم الزمان وهما كاينين= منها 12 خدامة و6 ستانباي.

بالنسبة لحالته قال بنجلون انه اشترى مضربة ب23 مليون درهم ماشي مضربة وهمية٬ وانه٬ يشرح ل”كود”٬ ادى لتسجيل الوثيقة في الوزارة 900 الف درهم بالاضافة الى اقتناء اليات جديدة واكد ان مجموع ما استثمره لحد الان 45 مليون درهم وقد يصل حجم الاستثمار من الاقتناء الى 50 مليون درهما.

واكد بنجلون ل”كود” ان مكتب الصيد البحري ما عطاه والو. حقو والكوطا ديالو خداها وصافي بحالو بحال 12 مضربة اخرى بحالو بحال صحاب الصيد الساحلي والتقليدي اللي كيصيدو حتى هما الطون “الوزارة عطاتني حقي. كنصيد كمية بحالي بحال جميع صحاب المضربات”.

ودعا الجميع الى الاطلاع على ما جاء في الجريدة الرسمية وما تقدمه المنظمة الدولية للحفاظ على سمك التونا في المحيط الاطلسي عوض تصديق ما جاء به الكاتب العام لمنظمة الصيد البحري

استثمار مثل هذا يؤكد بنجلون ل”كود” يتطلب ما بين 10 و12 سنة لاسترجاع الاستثمارات. وكانت دراسة سنة 2014 ذهبت الى ان المضربة كتخلي للمستثمر فحدود 400 مليون سنتيم سنويا.

بخصوص ما قاله الكاتب العام لمنظمة الصيد البحري عن الصيد مع شركات اخرى٬ رد بنجلون “الصيد المشترك ما بين الدول مسموح به وفق الكوطا المحددة”.

المعركة فيها السياسة. البام مضاربة مع البي جي دي وشادة فالتجمع الوطني للاحرار =عكاشة واخنوش=. حراك الريف حرك امور كثيرة

للاشارة فان التونا اللي كيهدر عليها ما كتستهلكش فالمغرب بل تصدر تقريبا كلها. شي براكة قليلة تبقى فالسوق وغالبا ديال الصيد التقليدي وصافي