حسب ما يبدو من هاد الاحداث المتواردة أنه أبشع جريمة يمكن أن يرتكبها مواطن مغربي فقير في هاد البلاد السعيدة هي جريمة الانجاب ،حيث بصح را مهمة باهظة التكاليف أنك تولي أب وعندك وليدات بزلتيهم متعمدا او عن طريق الخطأ فلمغرب،
وكيفما كتب الناشط “مع راسو” أيوب المنصوري ما مفاده أنه خايبة بزاف تزاد فلمغرب ،ولكن الاخيب من هذا گاع تكتشف راسك طيرو ليك فيه أهم عضو يرتكز عليه مسار حياتك …
وهذا ما وقع مع السيدة إلهام الناعوري للي اورد قصتها عبد العالي الوديعي وقال
انه السيدة الناعوري ناضت ختنت ولدها في مصحة في الدارالبيضاء ، وبسبب واحد الخطأ من الطبيب وقع بتر لعضو الطفل التناسلي.
من بعد ثلاث سنين وحملة طويلة للمطالبة بحقها ، الطبيب مازال خدام عادي وما تعاقبش على الخطأ ديالو ، والأم شدوها البوليس بتهمة التشهير بالمصحة…..
(وهادي هيا ضربني وبكا وسبقني وشكا)

وكتبت تعليقا على الحادث الناشطة الصحفية أمل الزيتوني:

ها يجيو شي قرودة يقولك هاد السيدة خرقات القانون الفصل سبعلاف و تمنطاش و لازم تعاقب بغض النظر عن انها هي و ولدها الضحايا الحقيقيين ..
هاد القرودة لي كيتفكرو القانون غير على الضعفا و كتشدهم اللقوة على البقع الارضية و تعويضات البرلمانيين و داكشي ، دايرين بحال داك اللي دروج دارو مسخين ، فعوض ما يسيقهم ملفوق ، كيمسح جوج درجات الاخرين و يقولك انا نقي ..

فيما علق في نفس السياق أيوب مسافي :

#الهام_الناعوري تقدر تكون اختك ، امك ، خالتك اشنو هي القصة ديالها .. القصة ابتدات تلات سنوات قبل فاش توجهات هاد السيدة لمصحة خاصة من اجل ختانة الابن ديالها ، الطبيب المسؤول على العملية ارتكب خطا طبي و بتر العضو ديال الطفل ، و لاننا دولة لا تحترم نفسها فاش رفعات الام دعوة على الطبيب و المصحة ، ناضت المصحة دغيا رفعات دعوة على الام بتهمة التشهير دازت تلات سنوات و الطبيب او الجزار ان صح التعبير باقي كايمارس و الحق ديال السيدة و الابن ديالها في ظل مجتمع مريض مرجعش … و الادهى ان الام تقدر تتحاكم لانها شهرات بالمصحة …

وعلى غرار هذا ،القضية كونها “إنسانية”عرفت واحد الحملة ديال التنديد والتضامن مع السيدة إلهام الناعوري واسعة النطاق على مستوى الفيسبوك شارك فيها بزاااف ديال النشطاء على مختلف مشاربهم: عدميين واسلاميين وحداثيين وصحفيين وسلفيين و لي ضد المخزن وللي مع المخزن ومن اول من بدا الحملة عبد العالي وديعي الى لبنى أبيضار الى حسن حمورو وسقراط و أمين لبارودي والخ الخ

في حين لا يزال الصمت اللمط هو سيد الموقف بالنسبة لبزاف ديال الجمعيات حقوقية للي من بينهم واحد جمعية ماتقيش ولدي للي مابقينا سمعنى ليها الأثر مسكينة منذ عام حزق وش