كود هناء ابو علي ////

هاد البلاصة اللي كاين فيها عبد اللطيف لجواهري كوالي بنك المغرب كلشي باغيها كلشي حاط عليها العين. ما كايناش مرة فالاسبوع ما يخرجش اسم يتم تداوله باش لتعويض الجواهري اللي طلع ليه الدم وعيى وبغى يمشي فحالو وهو فقمة عطاؤو.

فالاول قالو الفعفاع اللي خرج على وزارة الخارجية وهداوه كوب 22 وبلا طايلة. مشكلتو ان هاد السيد كلو مشاكل. فضايح وفضايح وفضايح. بلا ما نهدرو على انتماؤو السياسي لمؤسسة خاصها تكون فوق الحزبي. من بعد جابو حسن بوهمو الباطرون السابق ل”الشركة الوطنية للاستثمار” =الهولدينك الملكي= حتى هو ما يمكنش. باطرون شركة الباطرون لكبير اي الملك ما يمكنش يكون فهاد المنصب.

دابا كيروج اسم نور الدين بنسودة الخازن العام اللي كان فالضرائب ولكن هادا عندو شوهة ما عمر لمغاربة ينساوها ليه. عطيني نعطيك مع الفعفاع باش كان وزير للمالية. تعيين هاد خينا اللي قرا مع الملك فهاد المنصب تعيين عبثي.

بنك المغرب خاصو ناس عندهم تجربة فالمجال البنكي وما داخلينش فالبيع والشرا والتبزنيز وعطيني نعطيك وما عندهمش غطاء سياسي.

احمد رحو ديال القرض العقاري والسياحي كاليبر مزيان وتعيينو فيه اشارات زوينين. واخا دوز شي ايام مع الهولدينك الملكي باش كان ف”لوسيور” ولكن السيد محترم بزاف وعندو هاديك السلطة المعنوية اللي كيفتاقدوها هاد المرشحين خاصة الفعفاع. كاين طارق السجلماسي ديال القرض الفلاحي. خدام مزيان ساكت وشاد طريقو وما عندوش مصالح هادوك المرشحين. بجوج هادو عندهم خبرة كبيرة فالمجال البنكي وفاهمين الواقع المغربي ومطلعين على الاقتصاد المغربي وعارفين الوضعية الدولية.

هاد المنصب خاصو ناس فحجم لجواهري. تعيين الفعفاع اوصاحبو بنسودة تخربيقة كبيرة