اسماء غربي كود ////

قال مصدر حكومي ل”كود” ان قرار منع مسيرة 20 يوليوز بالحسيمة تحكمت فيه امور كثيرة. المصدر اكد ل”كود” ان الوضع الاقتصادي في المدينة صعيب بزاف بزاف. وزير اخر في حكومة بنعرفة قال ل”كود” ان السياح هربو وحتى هادوك اللي كانو كيجيو من الخارج باش يدوزو ايامات فهاد المدينة دارو بناقص ومشاو لمدن اخرى.

المصدر قال ل”كود” ان الغرف اللي كانت كدير اكثر من 1500 درهم دايرين ليها 800 درهم واخا هاد الشي الحجز ما كاينش.

لكن القطاع اللي كلى لعصا بزاف وفق مصدر حكومي ل”كود” هو الاستثمار “الوزير العلمي =وزير الصناعة والتجارة= جاب جوجت الشركات للحسيمة ولكن مع استمرار الاحتجاجات ما يمكنش لشي حد يستثمر” المصدر نفسه اكد ل”كود” ان رئيس الحكومة قنع شي شركة ديال الكابلاج باش دير شركتها الثالثة فالمغرب فالحسيمة ونفس القضية كتطرح.

المصدر قال ل”كود” “الحسيمة غادية وتموت ومسؤولية الحكومة تتدخل توقف هاد النزيف. والمنع داخل فالتعاطي الاستيباقي”