29/04/2024 08:15
ها أش جا فحكم قضائي.. الهدف من الرادار هو الوقاية من الكسايد وماشي تصياد المخالفات
سهام البارودي – كود
—
الاماكن كلها مشتاقة لك
و العيون لي نرسم فيها خياااالااااك …
….
هاد الأغنية هي لي كاتجيني ديال الظرفية الراهنة !
الصراحة مؤخرا طراو بزاف ديال الحوايج فالمغرب خلاونني نفكر فبنكيران و نقول مع راسي ” كون غير كان نشوف شنو غايدير” ! و لي زاد خلاني نتوحشو هوما الاحتجاجات الأخيرة فالريف !
الصراحة مؤخرا طراو بزاف ديال الحوايج فالمغرب خلاونني نفكر فبنكيران و نقول مع راسي ” كون غير كان نشوف شنو غايدير” ! و لي زاد خلاني نتوحشو هوما الاحتجاجات الأخيرة فالريف !
شنو كان غايقول بنكيران فهاد الأحداث ؟ آ شمن خرجات كان غادي يدير ؟ وا شمن قفشات كان غادي يطلق ؟ كيفاش كان غايكون الحراك ديال الريف بنكهة بنكيران؟
الحاجة لي متأكدة منها، هي أنه هاد الحراك كان غايكون بطعم آخر مختلف تمام الاختلاف على شنو واقع دابا ماكانقولش بلي بنكيران كان غادي يلقا الحل السحري و لا كان غايحبس الحراك ! و لكن كان غايخلي الحراك يبان صغير قدامو ! حيت بنكيران تاحاجة ماكانت كاتبان كبيرة عليه و على القفشات ديالو! و الدولة دوزات بيه مشاريع و قوانين سنين و هي ماقاداش دوزهم و نگر عليهم الشعب و لكن فالأخر سرطهم ! و نفس بنكيران لي قال للشعب فاش احتج على غلاء الحليب و دانون “واش مابقيتوش كاتعرفو تصاوبو الرايب؟ ديرو الرايب فديوركم” نفس بنكيران لي قال للبرلمانية ” حشمي شي شوية راه ماكانبغيش نجبد العار !” ” ديزولي ديزولي نتي ماكاتعرفيش الديموقراطية و ديالي كبر من ديالك” كان يقدر يتحفنا مؤخرا فالبرلمان بشي قفشة من القفشات ديالو على الحراك ” شنو بغاو ناس الحراك ؟ السردين ب سبعة الدراهم طيلة شهر رمضان ؟”
” ايوا راه بواطة ديال السيفيانا دايرة غير ستة دراهم “!هاهاهاهاهاها
و كان غايخاصم عليهم بديك ” آ سمعوو آ سيادنا ” …
و يقدر يمشي لشي عرس فالريف و يشطح على گع گع يا زوبيدة باش يبين ليهم بلي هوا ريفي اكثر منهم !
و لا يلبس ديك الجليليبة ديالو البيضة و يبان مكتائب و يخرج يبكي ” واش أنا خبيت عليكم شي حاجة آ خوتي ؟ واش أنا لي حيدت ليكم السبيطار و الجامعة ؟ هانتوما كاتشوفو آ خوتي ! الدويرة لي ساكن فيها مازال ماصلحت ليها الكوزينة “
و غايعطينا مادة دسمة نقتاتو عليها للمقالات و مقالات الرأي، و نكتب عليه أنا و حميد زيد و سقراط و حكيمة و هناء أبو علي !
ولكن للأسف ماكاينش بنكيران!
الحاجة الثانية لي متأكدة منها هي أنه بالرغم من الخطابات ديالو لي كاتبان شعبوية و القفشات ديالو لي كاتجي لشي ناس استخفاف بقضايا مهمة ! الدولة فقدات مع بنكيران أحد الإيباگات المهمة ديالها لي كاتحميها من غضب الشارع !حيت بنكيران نقدرو نتافقو معاه و لا نختالفو معاه و لكن السيد كاتبقا عندو كاريزما لي ماعند تاواحد من هادو لي تبعوه ! و كايعرف يهضر مع الشعب و حتى الشعب كان كايشوف فبنكيران المسؤول السياسي لي “مسؤول” ديال بصح ! كايشوفو فبنكيران هوا لي دار المعاونة للعيالات الهجالات و كايبغيوه ! و كايشوفو فيه هوا لي زاد عليهم فالمازوط و كايكرهوه! بنكيران كان هوا ديك الايرباگ لي كاتمتص الدقة ديال صندوق النقد الدولي و ديال اصحاب القرار الحقيقي ! كاتجي فيه الدقة و تاهوا كايهزها و حامد الله و شاكرو !
اليوم للأسف و لسوء حظ الدولة ! تاواحد مايقدر يلعب الدور لي كان كايتقنو بنكيران ! رئيس الحكومة الجديد و الوزراء ديالو كاملين حتى واحد فيهم ماعندو كاريزما بنكيران ! و ثقة بنكيران و طريقتو فالتعامل مع الاحداث ، و هادشي كايخليهم يبانو ضعاف ! ضعاف بزاف لدرجة حتى واحد مامتيق بلي هوما بصح مسؤولين عن أي قرار ! و هنا فين كاتبقا السلطة بوحدها فاص آ فاص مع الشعب بلا أي ايرباگ حقيقي لي يقدر يمتص الغضب ! و هنا فين كايولي الحضور ديالهم فالحسيمة و لا فغيرها ماعندو تا معنى قدام مواطن كايشوف فيهم مامسؤولين تا على فمهم و شنو كايخرجو منو !
واااااا بنكيرانااااه
