اسماء غربي كود ///

بزاف على الصدف. يالله الياس العماري الامين العام لحزب الاصالة والمعاصرة تلاقى مع رجال الاعمال السينمانا اللي فاتت اليوم الوزير الفعفاع صلاح الدين مزوار كيتلاقى مع نفس العينة. رسالة الاصالة والمعاصرة واللي خرج بها المكتب السياسي واضحة وكتبرر علاش اللقاء. الحكومة الحالية غادية بينا للهاوية والاولوية راها للاقتصاد ماشي للسياسة. نفس الخطاب اللي جابو اليوم صلاح الدين مزوار. الفعفاع كال “شخصنة النقاش السياسي حاضر ة بقوة منذ أحداث 2011 والاستعراض في السياسة أصبح طاغيا في التواصل السياسي. طبعا كيقصد رئيسو فالحكومة الامين العام لحزب العدالة والتنمية عبد الاله بنكيران. واضاف “الاستعراض يعني عدم وجود مصممون سياسي و الرأي العام يدرك ذلك” ثم اكد “شخصنة النقاش تفقره وتشكل خطرا على المجتمع” والحل حسب مزوار بحال البام “من اللازم إرجاع الأمور إلى نصابها” واش هاد النصاب “عشنا تضخما في السياسة خلال خمس سنوات”و “الان يحب إحداث صدمة في الاقتصاد و الاستثمار”. هاد الخطاب خطير للغاية حسب احزاب العدالة والتنمية والاستقلال والتقدم والاشتراكية. لم نحسم بعد في اختيارنا السياسي وعليه كل شيء مؤجل الى ان يتم الحسم مع “التحكم” الذي يمثله “الاصالة والمعاصرة”. نفس الاحزاب تعارض الاحرار في كل شيء “الانتخابات المقبلة باينة محسومة ودابا غادين نحرموها ما لاعبينش وما ساكتينش”. هذا مضمون خطابهم.

المغرب ما محتاجش للاقتصاد فهاد الوقت يا السي مزوار وانت اول واحد خاصو يدافع على هاد النقطة. انت وزير خارجية فالواجهة ماشي وزير الخارجية الفعلي. شوف اش وقع منذ تعيين ناصر بوريطة وزيرا منتدبا. كاع الملفات لكبار بيدو. الملفات المتعلقة بالخارجية بيد الطيب الفاسي الفهري مستشار الملك كذلك. شفتي رئيس رواندا اش كتب. برك وتصور مع الطيب الفاسي الفهري واعتقد انه هو انت. هو لخص كلشي.

الاحرار بان تابع مفعول به ما عندوش استقلالية القرار. بان بحال نهار كال بنكيران لمزوار نيت “انت كركوز تحرك من الخلف” وهادي مشكلة سياسية الحلول الاقتصادية ما عندو ما يديرو ليها، ومن غير هاد الشي هاد الحلول ماشي هو اللي غادي يديرها بل شي مؤسسة ديال عباس العزوزي اللي طردوه من “ميدي 1 تي في”، واش هاد السيد تعول عليه؟ بلا ما نهدرو على التواصل اللي جاب ليه ملوك. واحد اخر حتى هو ما مطفروش.
جامع غير اللي ما فيديهمش وباغي يطفرو