كود اسماء غربي ت ايس برس /////

ما تعرضت له دنيا بوطازوت الاثنين الماضي من اعتداء خطير جدا. الشهرة ماشي ديما كتفتح ليك بيبان. بعض المرات كتفتح ليك عينيك بشي ضربة ولا تهرس ليك نيفك كيفما وقع للممثلة دنيا بوطازوت. مشات تقضي غراض بحالها بحال اي مواطن فمقاطعة.

شي وحدة ضاسرة سباتها ولا حشات ليها الهدرة. علاش كدوزي انتي اللولى علاش ما درتيش الصف. هاد لشي كيوقع.

المسؤول ماشي اللي دخل بلا صف بل اللي خدام فالمقاطعة اللي سبقو. ثم دنيا بوطازوت كون بغات التدخل مزيان ما تجيش كاع. واش عمركم شفتو شي مشاهير فالمقاطعات. راه المقاطعة كتمشي عندهم. هادا خروب بلادنا وعارفينو.

ان تذهب بوطازوت الى المقاطعة فهذا يحسب لها. مثل اي نجم راه كلشي كيبغي يتهلى فيها. شوفو غير فمطاعم كيكون شي مشهور والناس تصور معاه واللي كيسربي مهلي فيه وفالاخير شي معجب كيخلص عليه بلا ما يسيق لخبار.

دابا على وثيقة ادارية ناضت هاد البنت وهرسات لينا نيفها. شفت فيديوهات العائلة وصاحبتها. ما مقنعنيش ابدا. ما عندهاش الحق تتكلم وتسبها وتنكر عليها. والغريب ان هاد البنت جات تجمع لوراق باش تدفع لشي مباراة ديال الدرك ولا البوليس، واش هادي غير ناوية وهرسات لمواطنة معروفة بزاف نيفها ونهار تدخل اش غادية دير.

بات البنت كال ليك علاش ما يشدوش بوطازوت. وا الحاج واش بعلقك؟ دنيا راها فالصبيطار وهي اللي تعداو عليها وراه وهي تقدر تطلب الملايين تعويض علاش تعداو على باش خدامة اي وجهها. دابا مع رمضان قرب والخدمة موجودة ما يمكنش تصور ووجهها خاسر. شكون يعوضها يا الحاج اللي ما ربيتيش بنتك.

المشكلة عند شي وحدين ديما كيجيو مع المواطنين ايلى ضاربو مع مشاهير. اللا كاين القانون وهاديك خاصها محاكمة عادلة والسلام