سهام البارودي كود ////

سيد القمني كان قال واحد النهار” الدين الذي يستمر في البقاء هو الدين الذي يستطيع اصحابه تطويره و اقلمته مع مقتضيات العصر” ! طبعا هاد الجملة ماغاتعجبش بزاف ديال الناس لي كايقولك الدين صالح لكل زمان و مكان … ماعليناش!

قضية الورث ماشي اول قضية غادي تخلق ضجة بين المغاربة حيت كلنا كبرنا و حنا كانسمعو ” المرا عندها عود و الراجل جوج عواد” ولكن اليوم القضية تطورات! و حنا كانعيشو فدولة كاتعامل معانا على اساس حنا مواطنين ! العيالات كايخدمو فحال الرجال ! بجوجنا كانتخلصو ! بجوجنا كانخلصو نفس الضريبة على الدخل ! بجوجنا كانكوتيزيو لل CNSS بنفس القدر ! و نهار كانمشي ندير المازوط فالبومبة ماكايحسبوهش ليا بنص الثمن حيت أنا مرا ! نهار كانمرض كانخلص الفيزيتة ب 250 درهم ماشي 125 درهم حيت أنا مرا ! و زيد و زيد … اذن علاش العيالات سواسية مع الرجال فالحقوق ! و فجميع مجالات الحياه كايتم التعامل معاهم كمواطنات … و فحالة الورث كانشدو الزكار معاهم ! “لا لا لا ضروري تبقا ديك القضية ديال للذكر مثل حظ الانثيين” مايمكنش ! شي حاجة ماشي هي هاديك … حيت من غير المعقول انو فمغرب 2015 ! مغرب المناصفة ! المغرب لي فيه بنات خدامات! قايدات ! بوليسيات طبيبات محاميات كاتلقاهم فجميع مجالات الحياه مازال كانتعاملو مع قضية الورث بهاد الشكل !

المتدينين كايعتابرو ان المغرب دولة اسلامية و انو هاد المسألة ديال الورث راه صافي لا تبدلات غاتكون علامة على ان الدولة فقدات ديك التيكيتة ديال اسلاميةإ

و عاوتاني ديك الجملة ديال ” واش المغرب دولة اسلامية ” غاتبدا تبان عند “قريش 2.0 “! فراسكم شحال من مرة تانا كانسول راسي واش حنا دولة اسلامية فاش كانكون كانتسارا فلاكوط فكازا و لا اكادير و لا طنجة… واش حنا “دولة اسلامية”؟ فاش كانكون فالشوراسكاريا كانتفرج فالبرازيليات بالسليبات كايشطحو … المغرب دولة مدنية هادشي لي وصلت ليه كخلاصة … او على الاقل دولة اقرب بكثير الى الدولة المدنية من الدولة الاسلامية !الدولة الاسلامية هي السعودية لي كاتطبق الحدود ! قطع يدي السارق من خلاف ! الرجم و الضرب والرمي من شاهق… هادو هوما الحدود الاسلامية !! حنا دولة مدنية ولكن عندها شي “تفيتيفات” اسلامية فالقوانين ديالها و لي غايمشيو مع الوقت و التطور ديال المجتمع والعقليات… ايه ماشي العام الجاي ماشي العام لي موراه، يمكن فاش يوليو القرودة كايسوكو الطوبيسات و لكن غايجي واحد النهار و غايختافيو دوك القوانين حيت التطور كايفرض راسو.

عقلتو على المدونة ؟ نهار تفرضات ! ازمطات الباشار! بنادم ولا كايقوليك آآآو كيفاش البنت تنوض تجوج راسها ؟ ايه ا سيدي صافي سي فيني ! تاتجوج راسها ! كيفاش الراجل خاصو الموافقة عاد يتزوج على مرتو هادشي ماكاينش فالشرع ؟ ايه ا سي خاصو الموافقة واخا ماكاينش فالشرع سير جيب الموافقة عاد أجي!!!

المغرب ماكايطبقش الشريعة من حسن الحظ طبعا اما كوراه بزاف د المغاربة ولاو كي ماضلين ديال جوج دراهم لايدين لا رجلين ! يبداو يهزوهم كي البنادر من الثقبة د *ك !

هاكا دايرة القضية عندنا فالبلاد، كايبانو مواضيع ! كايتعرضو للنقاش من بعد المخزن كايحدد واش وصل وقت التدخل و لا مازال ! المخزن داير فحال هاداك ولد الحومة لي كايكون واقف فراس الدرب و كايتفرج فجوج ديال البراهش مخاريين على كورة واحد شانق على لاخور ” رخي اصاحبي ! رخي ولا نضربك و الله تانضربك ” من بعد شي كايرخي من شي و كايمشيو بوحدهم فاش كايعياو. حتى لواحد النهار واحد فيهم كايجبد شي مطوية و القضية كاتقرب تحماض ! تما تايدخل المخزن ! كايصرفق داك الكبير فيهم!”تايسول ديالمن كورة ؟ ديال الصغير ! خود كورتك ! و نتا ا الحكار ديكاج من حدايا و بعد من هاد الكورة و نعاود نلقاك تاتعدى على مالين الكواري مانعقلش عليك” …

واحد النهار كايلقاه مشاد مع رحمة بنت الحسنية حيت لابسة صاية قصيرة … كايبانو ليه كاع العيالات لابسين الجلالب فالحومة تايقول مع راسو خليهم بيناتهم احسن ليها تجمع راسها راه غاتجيبها غا فعظامها ! الصاية ماشي ديال حومتنا شي نهار شي حد يخصرها « …

ولكن نهار كاتبان ليه رحمة بنت الحسنية و زينب بنت العياشي و هند خت عبد الرحمن و مونية بنت عم رشيد لابسين الصايات و الحكار كايتسناهم فالدورة هاز الما قاطع … تايمشي تايجري عندو “عاوتاني نتا؟ شكادير هنا؟ ياك داك النهار دويت معاك ” “اه ولكن دويتي معايا على كورة ” “مال دينمك حمار ماباغيش تفهم ! ماق مرملاق ” دخل فيه بدماغ و سيفطو كايبكي “وا موي وا موي …”

الأمور كاتخضع كلها لمسألة الأولوية و الوقت، شكون كان كايقول فالثمانينات و التسعينات أنه مواضيع فحال وضعية الأمهات العازبات و الاجهاض يتناقشو واحد النهار بلا ديك “ويلي حشومة! ناري حرام”… تا الورث راه غي مسألة وقت … دابا تجي نوبتو ! و يدخل شي نهار المخزن بالحكمة ديالو المعهودة و الخبرة الكبيرة لي عندو و الحب ديالو لينا باش يفاريها بين مؤيد و معارض بلا مطوية بلا ما قاطع …