كود : سهام البارودي///

هادي يوماين تفرجت فالنقاش بين المرشحين للانتخابات الرئاسية ففرانسا الأكثر جدلا! ثلاتة ديال السوايع ديال مني منك مني منك بين اليسار و اليمين و اليمين المتطرف ! و خرجت بمجموعة ديال الخلاصات:

كاينين 3 ديال المرشحين لي عندهم ايديولوجيات و أفكار واضحة و كايدافعو عليها بطريقة ذكية سوا تافقنا مع الافكار ديالهم و لا ختالفنا معاها، “مارين” ديال اليمين المتطرف و ميلونشون ديال اليسار و فيون ديال اليمين.

و كاين جوج مرشحين غي داخلين يغمسو فالمرقة ديال الانتخابات الرئاسية و تابعين جلالة بالنافخ! داك ودنين الجن ديال “هامون” و داك القفقاف ديال “ماكرون”.

أول مرشح بالنسبة ليا بان بلي عندو برنامج مسطر بالمسطرة هي مارين لوبين ! اليمين المتطرف لي كيما العادة كايعرف يلعب على الوتر الحساس ديال المواطنين لي هاد الوقت كايعيشو وسط الخوف و الأزمة الاقتصادية،”مارين” فينما كاتبان ليها المناسبة و فأي موضوع كاتجبد هراوة و كاتهبط على المهاجرين للراس ! التعليم خاصو يحبس لولاد المهاجرين السريين و ديك التخربيقة ديال المدرسة الفرنسية تولي كاتقري اللغة الأم ديال الطفل لي من أسرة مهاجرة فحال العربية و لا الكونغولية تاهي غاتحبس !فرنسا فرنسية و غاتبقا فرنسية! فالأمن قالت ليهم بلي ماغاديش تعاتق مع عدو ربو أي مشرمل ! غاتبني الحباسات و غادخل باباه لي سخن عليه راسو يتربى! قالت ليهم طيكسطو بلي غاتحبس شي حاجة سميتها الهجرة كيما بغات تكون ! هجرة سرية و لا هجرة قانونية ! باح مابقاتش آودي باغا شي قندوح يمشي لديك فرانسا و قالت ليكم باراكا راه عندهم مشاكيلهم يا الله يتكافاو معاهم ! عندهم الشوماج و عندهم الفقر ! و بلي باغا طبق السياسة ديال “صدقة صدقة فالمقربين أولى” و تتهلا فولاد بلادها ! توفر ليهم فرص شغل هوما الاولين و تفرض على المهاجرين لي عايشين ففرانسا ينضابطو للتقاليد الفرنسية و يحتارمو الهوية الفرنسية و لي ماعجبوش الحال يرجع لبلادو.

المرشح الثاني لي كان راجول و عرف يطلع يدافع على راسو هوا ” ميلونشون” العدو اللذوذ ديال مارين ! و لاكانت مارين هي لي كاتلعب الدور ديال بوعو ديال المهاجرين ! ميلونشون العكس ! حبيب المهاجرين ! و كأي يساري حقيقي عايش وسط واحد العالم بوحدو مسيكين باغي الخير لكلشي و ولد الدار الكبيرة! ماعندوش مشكل مع المهاجرين و كايدافع عليهم فحالا كايجيوه من الفاميلا ! و قالك مرحبا بأي واحد مكرفس فبلادو و باغي يجي لفرانسا! و كأي يساري حنين على الطبيعة باغي يحبس الطاقة النووية و يخلي فرانسا تخدم غي بداكشي ديال الطاقات المتجددة ! و عكس مارين لي ماباغاش تعاتق مع أي واحد سخن عليه راسو و تسيفطو لعلي مومن عفوا فلوغي ميغوجيس ! ميلونشون كايطلب من البوليس يحافظو على السلم و السلام و مايقلبوش على الصداع مع المهاجرين ! و باغي المدرسة تولي فابور ! و حتى الماكلة فالمدرسة تولي فابور ! و باغي يزيد فالصاليرات ديال الناس لي خدامين و يتهلا فيهم.

المرشح الثالت لي كان حافظ سواريه هوا “الحاج فيون الدكالي” المرشح المفضل ديالي (مالك كاتفرنس ؟ ايه ديالي ؟ واخا ماكانصوتش ففرانسا ولكن من حقي يكون عندي مرشح مفضل) ! “فيون” واخا هاز دقة صعيبة و سيفطوه بحيتة و الضوسي ديالو خانز عند البوليس ديال فرانسا حيت لقاوه مخدم مرتو بشي صالير خيالي و مضبر على ولادو فشي مارشيات و داير التخوفيش المغربي! داكشي علاش كانظن بلي خاصنا نعطيوه لاكارط و نسميوه “الحاج فؤاد الدكالي” حيت فعايلو فحال فعايل السياسيين ديالنا! المهم ماعليناش ! شغلو هاداك تازين ماخطاتو لولة ! واخا المصايب لي طايحين ليه على راسو الحاج كان راجول و عرف يدوي على البرنامج ديالو بطريقة واضحة ! واخا ماقدرش يخرج عينيه حيت مقودها ولكن جاني أكثر المرشحين “تعقلا” حيت فالوقت لي كلشي كايفكر بلي الحلول مشكل التعليم هوا خلق مناصب شغل للمعلمين و الحل لمشكل الأمن هوا خلق مناصب شغل جديدة للبوليس جا الجاح فيون الدكالي قاليهم حبس حبس حبس و طرح عليهم سؤال ذكي ” بااااااش؟ “” بااااش آ ولاد الق*** عوالين ديرو هادشي و فرانسا عندها مديونية كبيرة؟” هنا طحنهم و خلاهم كايتفتفو غا كايشوفو بعويناتهم و قاليهم بلي داكشي لي كايحلمو بيه زوين و لكن ماخاصهمش يكذبو على الناخب الفرنسي و يواعدوه بشي حوايج ماعمرهم يقدرو يديروهم حيت القضية محاكة ! فيون عكس ميلونشو لي بغا يحبس اليورانيوم قاليهم مايمكنش نوضو غدا و نحبسو اليورانيوم و ندوزو للطاقات المتجددة داكشي خاصو يجي بشوية بشوية !! و عكس مارين لوبين لي بغات تجمع شطايطها من الاتحاد الاوروبي و ماتباتش هنا فيون كأي يميني شارب عقلو قاليهم بلي الخروج من الاتحاد الاوروبي مغامرة غير محسوبة العواقب فالظرفية الحالية ! و كأي ليبيرالي حقيقي خلا الهضرة على الصاليرات و السوايع ديال الخدمة فيد الشركات.

بقاو جوج ديال المرشحين ! واحد ودنين الجن ديال “هامون” كايحلم مسكين بزااااف داير فحال صحاب الاف جي دي عندنا ! باغي يفرق الفلوس على كلشي ! و يحبس اليورانيوم ! و يرض الماكلة بيو ! و يزيد للخدامة فالصالير و ينقص ليهم من السوايع ديال الخدمة ! و المهاجرين مرحبا بيهم الدار دارهم ! و المسلمين يديرو لي بغاو ففرانسا الدار دارهم ! ماعندوش المشكل و باين كايلحس الكابا للعرب و عوازا و المسلمين باش يصوتو عليه.

و المرشح الثاني هوا “ماكرون” لي ماتقدرش تشدو واش من ليمن و لا من ليسر ! كايلعب على الاوتار بجوج و شبعان هضرة ! و ماباغي يخسر الخاطر لحتى واحد داكشي لي خلاه يبان ماعندش دينمو الشخصية فداك النقاش.

ولكن بالرغم من كلشي ! كاتبقا السياسة المغربية عندها طعم خاص ! الگور كاتحس بيهم عندهم des valeurs كايدافعو عليهم ! اليمين باين و اليسار ! و مطراسين خط بيناتهم ! حنا لا ! حنا ماعندنا لا يمين لا يسار المهم هوا الگاميلة تكون و كلشي يخشي يديه باش يغمس فيها داكشي علاش ماتستغربوش لاشفتو حكومة فيها الاسلاميين مع الشيوعيين مع الحداثيين مع الاشتراكيين مع الليبيراليين ….

ياك الگاميلة كاينة ؟

ايوا الگاميلة لي يغمس فيها واحد يغمسو فيها ثلاتين!

لا ماشي ثلاتين مليون مغربي، هادوك غانسربيو ليهم غي البلبولة