كود : البيضاء

عاش الوفد المغربي الى مدينة سطيف الجزائرية ليلة رعب حقيقية ليلة امس الجمعة بعد مباراة الرجاء البيضاوي ضد سطيف الجزائري. الصحافي المغربي في قناة “الرياضية” يسري المراكشي حكى ل”كود” تفاصيل تلك الليلة. “شفت اللي ما عمرني شفتو، الهدرة ما يمكنش ليها توصف داك الشي، وراه اكثر من عشرين مغربي مليوح فالگازو، شي كيكول راه جوج مغاربة ماتو والبوليس كيسلخ فينا وشي كيسب فينا وفبلادنا وفملكنا” يوضح يسري المراكشي ل”كود”.

الصحافي اكد ل”كود” ان البوليس والصحافيين وحمار رئيس وفاق سطيف هما اللي دارو هاد الفوضى “صحافي مغربي كال لي باللي صحافي جزائري خبرو بان المنصة اللي عامرة صحافيين فيها غير شي وحدين قلال والباقي كلو بوليس مزروع معاهم”، كما أضاف ان هاد البوليس “فين ما بان ليه شي مغربي صحافي ولا عضو وفد الرجاء ولا جمهور كيسبو “انتوما غير يهود” ومن بعد يبداو يضربو. الصحافي شدد في تصريحه ل”كود” انه لم يفهم هذه العبارة لان “ليهود ماشي معيورة” بالنسبة اليه. البوليس لبسوهم سيفيل ونزلوهم لارضية الملعب باش يسلخ ويسب لمغاربة” يحكي المراكشي ل”كود”.

ليلة رعب لم يخلص الصحافي من كوابيسها الليلة الماضية “ما قديتش ننعس كوابيس الليلة ما خلاتنيش ننعس” يشرح المراكشي ل”كود”.