كود مصطفى الشاذلي ///

عتارف سعيد الناصري، رئيس الوداد الرياضي، أن وليام جيبور، المهاجم السابق دبال الوداد، خذل 150 مليون سنتيم، باش وقع عقد مبدئي كيلتازم فيه باش اجدد العقد ديالو مع الوداد، وفي الأخير مشا وخلى لفرقة وخدا 150 مليون سنتيم.

الليبيري جيبور عرف كيفاش اصيد الوداد، استغل الوفاة ديال الوالدة ديالو وغبر على الوداد، ومني رجع قاليهم غادي نمشي لميريكان نشوف ولدي، ونطمأن عليه، وشا مبقى رجع، حتى سمعوه راه وقع للنصر السعودي.

وكان الوداد علن على أنه جدد عقد جيبور، ولكن اللاعبين كذبهم ومشى وقع لفريق النصر السعودي، عاد خرج الناصيري كيعتارف أن جيبور وقع غير عقد مبدئي وخذا 150 مليون.

ودابا كيفكر الناصيري باش امشي دعي جيبور عند فيفا باش ارد لفلوس للخذا، خصوصا أنه ملتازمش بالعقد ومشا سينا مع النصر السعودي.

جيبور عرف كيفاش اخرج من الوداد بلا صداع، وخلاهم واحلين مع الجمهور، بعدما كانو كيعتاقدو أن جيبور غادي ابقى العام الجاي مع الوداد، تفاجؤوا أن الوداد مجدوش العقد ديالو وضيعوه.

الناصيري غادي القى مشكل كبير مع الجمهور مني تبدى البطولة لأنه مغاديش القاو لاعب اعوض جيبور لكان هداف مزيان، وكيماركي بزاف.