محمد سقراط كود ////
ما أن تم عزل بنكيران حتى نسوه وبدؤوا في تعداد مناقب سعد الدين العثماني ، وبأنه متخلق وولد الناس والله يعمرها دار بحال الى جا يخطب من عندهم ، وبحال الى بنكيران مكانش ولد الناس ، أخلاق العثماني و أدبه وحسن سيرته ومعشره كنظن أنها معندها علاقة بتسيير الدولة أو برئاسة الحكومة ، ومايمكنش تدير تقييم لأهلية شي واحد فتسيير أرفع منصب فالبلاد من خلال حسن السلوك ديالو ، ومن خلال تسول جارو عليه ، هادشي ربما كاين غير فالمغرب .
الوصف ديال ظريف والله يعمرها دار ملي كيوصفوا بيه المغاربة شي واحد ، فغالبا كيكونوا كيقصدوا داك السيد الضعيف الشخصية المغلوب على أمره الدريويش، لذا قليل فين كتلقى شي مغربي كيعاود على باه أنه كان ظريف ودرويش والله يعمرها دار وحاكمة فيه مرتو ، بل بنادم كيبقى يتزايد على شكون لي كان باه أكثر الرجولة وقيادة أو بالأصح واعر، كان واعر كان صعيب وهاد الوصفين هوما لي كيعنيو عند المغاربة أن الشخص كان قيادي وشخصيتو قوية ، كذلك المرأة شحال من واحد كيقول أنا مرتي واعرة صعيبة ، يعني مكيقدرش يتفتف حداها ، بينما مرتي ظريفة مسيكينة ودرويشة كتعني راه مبورد كيما بغا ، وديما قوة الشخصية كنوصفوها بالصعوبية والوعورية .
ولكن ملي بقيت كنقرى عند العديد حول سعد الدين العثماني وكيفاش كيوصفوه بالظرافات والله يعمرها دار ، قريت هاد الوصف بخلفية ثقافية ديال مغربي كابر مع المغاربة وبانلي فهاد الشهادات والوصف أنها فعوض تكون تعداد لمناقب الرجل هي فالحقيقة انتقاص منه ووصفه بأنه مغلوب على الأمره ، حيث الوداعة عمرها مكانت من ميزات القيادة ، ولكن كالعادة المغاربة كيخلطو بين شهادة فرئيس حكومتهم وشهادة فجارهم .
هادي راه حكومة بلاد ماشي جامع فشي دوار غادي يشارط فيه شي فقيه باش خاص يكون الله يعمرها دار ، أسيدي يكون الله يخليها سلعة غي يكون حقا قيادي وبشخصية قوية وبحضور وكاريزما ، ولي بصح يقدر يكون حكومة قوية بأطر فالمستوى وماشي يرضخ للإبتزازات الأحزاب الأخرى ولإقتراحاتهم الوزارية ، ولكن للأسف كيبان أن المغاربة ولاو طالبين غي السلة بلا عنب ، ومابقى خاصهم لا قيادي قوي لا رئيس حكومة بحضور ، المهم يكون درويش والله يعمرها دار ويشفق عليهم .
