الانسان التابع للأمم المتحدة فجونيف، و طبعا لي غايهضر بسميت المغرب هو الرميد وزير ” حقوق الانسان”.
المغرب عطاه مجلس حقوق الانسان مجموعة من التوصيات( من أصل 244 توصية ! المغرب قبل ب191، و رفض 44 توصية، 18 رفضهم جزئيا و 26 رفضهم كليا).
التوصيات لي رفض المغرب أغلبهم داخلين فإطار الحريات الفردية و حماية الأقليات و حقوق المرأة بمعنى:
المغرب مابغاش تجريم المثلية، و مابغاش يمنع زواج القاصرات( برفع سن الزواج ل18  سنة)، و مابغاش تحقيق المساواة في الإرث بين النساء و الرجال، و ماغاديش يدير قانون كايجرم الاغتصاب فبيت الزوجية و غادي يبقى يعتبر العلاقات خارج إطار الزواج جريمة و شلا حوايج أخرين داخلين فباب حماية حقوق المرأة و الطفل و الأقليات الدينية و الجنسية.
هادشي فدولة عندها وزارة قدها قداش سميتها وزارة حقوق الانسان. وا تصنطي آ كندا ! و سمعي على ودنيك آ الدانمارك! و ديرو فيكم شوية ديال النفس آ باردين الگلب و تعاندو معانا و ديرو ليكم شي “وزارة ديال حقوق الانسان” تانتوما.
و هادشي گالو المغرب بشكل صريح قدام المنتظم الدولي البارح، الشيء لي خلا بزاف ديال المنظمات مايديروش بحساب راه عندنا وزارة ” حقوق الانسان” للأسف و تسلخنا مزيان فالتقارير ديالها لدرجة حتى  الجهود لي دارها المغرب فهاد المجال ولات كاتبان صغيرة قدام الهضرة ديال دوك المنظمات ملي كايبداو يتناوبو عليك و يسلخوك قدام الدول على مجموعة قوانين قروسطية فحال “زواج القاصرات”.
أنا الصراحة مافهمتش علاش الدولة مازال متشبثة بهاد القوانين القروسطية لي كاتخلي للعادي و البادي منين يدوز لينا؟ علاش آ خويا غايسخسخوني المنظمات الدولية ديال حقوق الانسان و حقوق المرأة قدام العالم كامل و يبداو يجبدو ليا الخز ديال الاحصائيات لي عندي لي كاتقول بلي كاينة على الأقل واحد 35 000 حالة زواج قاصر فالعام و بلي العدد في تزايد و بلي هاد العدد براسو غير شوية من بزاااف لي كايتزوجو غير بالفاتحة و بلي عدد كبير من هاد البنات لي كايدخلو فهاد الزيجات بلاصتهم فالمدرسة و كايساليوه هاد الفيلم ديال الزواج فقسم قضاء الأسرة كايضاربو مع الراجل على النفقة ! و فنفس الوقت الدولة لي خاصها تفكر فحل حقيقي لهادشي و تمنع هادشي حيت أغلبية الوقت الزواج كايكون بسبب الفقر ديال الأسر، كاتخليهم يتجوجو باش يهنيوها من صداعهم (واخا غير مؤقتا) و كاتلقاها ملاهية و خدامة بالبوليس و الجادارمية و الوكيل و متابعة جوج كبار راشدين و بعقلهم عندهم علاقة جنسية رضائية؟ و علاش غادي نخلي للمنظمات العالمية ف2017 تفكرني بلي بالرغم من المشاريع الكبرى و الموروكومول و التيجيفي و واخا كانتبجح حتى نعيا بالتقدم الملموس فحقوق الانسان راه مازال عندي ناس مشدودين فالحباسات حيت شربو الما فرمضان؟  و ناس اخرين تاهوما حيت عندهم ميول جنسي مختلف؟