د. مراد علمي
أستاذ جامعي، كاتب ومترجم ./////

على حسب ما كانلاحظوا يمكن لينا نقولوا بأن الإخوان الترك بداوْا كايطلـّـوا على الحافة، على مستقبل مجهول أو أكيد ما عندو حتى شي رتباط بالديمقراطية الحقة، حالة الطورئ ما كاتبشـّـرش بالخير، فى هاد الحالة عند أردوغان الحق يعمل اللي بغى، إقوم باعتقال اللي بان ليه فيه البلان بحال صحابو القدام اللي بدا كايدخـّلهم بالألوف ألــّـحباسات، كانقصد أنصار حليفو كولن اللي هرب، خـاف منو لا أطـّـرى ليه شي حاجة، حالة الطوارئ فى فرانسا ماشي بحال فى تركيا، فرانسا بلاد متحضرة كاتحتارم حريات، تطلعات الشعب أو كاتفـرّق بين السياسات العمومية أو حياد القضاء، ما عمـّـر الحكومة ولا ّ رئيس الدولة كايدخـّـل ولا ّ إحاول إدخـّـل فيه، لأن تقسيم السلطات ما كايتـــّـناقش، كولّ واحد كايعمل خدمتو.

فى الديمقراطيات الحقيقية الشعب هو مول السلطة أو كلمة الفصل، أو ماشي صنادق الإقتراع هي اللي غادي يمكن ليها تبرّر كول حاجة بغيتي ولا ّ نويتي تعمل، الديمقراطية ماشي غير عملية حسابية، ها شحال جبت ها شحال جبتي من صوت، غير الغبيين اللي كايخـمـّـموا هاكدا، مع الأسف طرف كبير من أنصار العدالة أو التنمية المغربية اللي ملـقــّـمين أصلاً على النموذج التركي كايفكروا هاكدا، الديمقراطية كثر من هاد الشي كولــّـو، هي أدبيات، أخلاقيات، قيم، فاين كول واحد كايلقى بلاصتو، اللي عندو بحال اللي ما عندوش، القوي كايتعاون مع الضعيف، أو ماشي بحال أهل الغابة أو البونية فى الجيب ولا ّ القوي هو اللي ديما خصـّو إكون عندو الحق بحال اللي كايطرى دابا فى تركيا أو طرى “ديـجـا” فى مصرة حتى سحق السيسي الإخوان المسلمين اللي كايتعاطف معاهم ليومينا هادا أردوغان، المهووس بالإسلام السياسي، من الأحسن البرانويا، الحمـّـى الإسلامية.

فى الديمقراطيات الناضجة قوة الأغلابية كاتــخضع ألــْـقـوة الحـق أو القانون، هي اللي كاتراقبها، أو إيلا ما عرفاتش كيفاتش أتــّـعامل مع هاد الظاهرة ما بقاتش ديمقراطية ولاكن ديكتاتورية، لأن الديكتاتورية كاتعتابر القوانين غير خزبلات أو مؤسسات الدولة ماشي ملك، فى خدمة جميع المواطنين، المواطنات ولاكن فى صالح الحاكم المطلق أو بسّ.

حسب مفهوم أردوغان للديمقراطية هو “أنا هي الدولة”، أو كول واحد عارضو، نتاقدو عن حـق، قناعة، العافية أو الباروض، ما حشم ما ستحيى حتى وقــّـف، عتقل كثر من 000 60 شخص، دابا عاد بان، أتــّـفضح أوجه الإسلام السياسي الحقيقي الخبيث بلا ما يبقى كايتخبـّـع مورا خرافات المؤامرات الكولانية اللي عيى ما إكـرّر فيها من قبل إمبراطور الـتــّـرك.

بعد أمـّـا بدا كايدخـّـل حتى القضاة، المدعون العامون ألــّـحبس ميـيــّـع، قضى على المؤسسات الديمقراطية، لأن القضاء خصو إكون ديما بعيد على السياسة، فى حياد تام، أو غير فى الدول التوتاليتارية ولا ّ شبه التوتاليتارية كاين الخلط بيناتهم باش تكون الطريق قصيرة، اليد طويلة أو تحصد هاكدا اليابس أو الخضر.

حالة الطوارئ ما كاتدلّ غير على أن أردوغان باغي يعطي مشروعية ألاّمشروعية، فينا هو حترام المؤسسات، دولة الحق أو القانون؟ إيلا عتاقلتي أساتذة جامعيين، أساتذة من جميع الأسلاك، قضاة، محامون، رجال شرطة، عسكر، مدّعون عامون، صحفيين، سدّيتي محطات تليفزيونية، راديووات، دور النشر إلخ، بالأخص بهاد السرعة الفائقة، دولة الحق أو القانون عندها مساطر، فصول، بنود باش كول واحد إكون عارف شنو كاينتاضرو، بطريقة شفافة، ماشي تجي نتا أو تنقـّـز فوق الناس كولهم أو أتــّهم هادا ولا ّ هاداك بلا ما تقدم حتى شي حجج دامغة.

ضروري نقولوا اليوما أن تركيا رجعات دولة بلا قوانين، فاين شخص واحد كايعمل اللي بغى، أو إيلا هادا هو النموذج اللي بغاوْا لينا الإخوان المغاربة ضروري نتبرّاوْا منهم.

باقي ما نسيناش كيفاش دافعوا بشراسة على محمد مورسي، أو بالنسبة ليهم باقيين كايحلموا بأنه هو الرئيس الحقيقي ديال مصرة أو كايتسـنــّـاوه بالريق الناشف فوقتاش يخرج من الحبس، إيلا طرات هاد المعجزة أكيد عيالات الإخوان المغاربة غادي إضربوا البندير، إزغردوا، إفـرّقـوا الحلوة فى الدروبة أو الزناقي باش إكون الفرح شامل، كامل.