محمد سقراط كود === =

من المنطقي أن يتم تبرير المشاركة العسكرية المغربية في عاصفة الحزم ضد الحوثيين فاليمن، بأنها كتخدم مصالح الدولة مع الدول الخليجية الشقيقة من باب المساعدات المادية وداكشي، ولكن باش يتم حشد السلفيين والإستعانة بآخرين من السعودية واليمن ومالي ويديرو ندوة يهدرو فيها على خطر التشيع فالمغرب وفقلب المسرح الملكي بمراكش، أي فقلب واحد البناية لائكية دنيوية تختص بالفن والإبداع، حتى كتلقى سلفي سعودي ناشر رجليه فيها ويدعوا لمحاربة مغاربة آخرين فقط لأنهم يخالفونه فالعقيدة فهذا قمة العبث واللامعقول واللامسؤولية ديال الدولة.

أغلب الكوارث الإجتماعية لي كنعيشوها وهاد السكيزوفرينيا المغربية سببها مية فالمية هوما رجال الدين المشارقة وقنواتهم البيترودولارية ، هاد الناس لي أثروا فالمغاربة وحولوهم من مغاربة بمعتقد صوفي أو يميل أليه وشعبي فغالب الأحيان، إلى تشوهات خلقية وعقائدية باغا تعيش هنا الحياة وباغا تدخل للجنة على الطريقة السلفية، من بعد ماكانوا المغاربة كيزورو السادات ويحيون المواسم وناشطين ماشطين عابدين مستغفرين الله، دخلات لينا عبر الكاسيط فالبداية ومن بعد عبر البالابور ثقافة حرام وحلال، وفجأة ولاو بعض المغاربة يعتبرون زيارة السادات نوع من الوثنية والشعودة، وبدلوها بزيارة بؤر الثوتر فالعالم والإنضمام للجماعات الإرهابية، من بعد مكانو المغاربة كيتفرجو فبرنامج مداولة وكوادالوبي وأسبوع الفرس والتزلج الفني وسهرة السبت، ولاو العديد منهم النهار كامل وهو طالق قناة الرحمة أو الناس، فالمحلبات عند الحلاقة فالحوانت ديال الخياطة عند الناس الشعبيين فجأة جاتهم واحد الردة للأصولية، حيث أطل عليهم من التلفاز من يقنعهم أنهم كانوا يعيشون في ظلال مبين وبإستعمال الخطاب الديني وقال الله قال الرسول بداو كيسممو المغاربة بذهنية التحريم، في غياب تام لبديل مغربي حقيقي من غير مسلسلات تركية مترجمة، حتى فجأة بدا التفركيع وفاقو المغاربة على هول الصدمة، العديد منهم مصدقش ولكن فنفس الوقت ماعاداوش صحاب اللحي بقاو بالنسبة ليهم رجال صلحاء عارفين بينهم وبين الله.

جميعنا يعرف المغراوي وكيفاش كان تصدر الأخبار ذات يوم بعد افتائه بجواز زواج ذات التسع سنوات ، حقا الفتوى صحيحة فقهيا حسب عدة مذاهب ومنهم مذهب السنة والجماعة ، ولكن المغاربة مكانوش مسوقين لهادشي ممحتاجينش تبرير ديني لزواج القاصرات، فعدة مناطق غي كتبان ليهم البنت كبرات ومع الفقر والأزمة كانوا كيزوجو بناتهم صغار ولكن تحث ضغط اكراهات الحياة ماشي بتبرير ديني، وهاد الفتوى كانت سبب غياب المغراوي على المغرب وعلى الساحة الدينية فالمغرب، وفجأة وكما هو معروف على النظام المغربي من السنة التي سنها الحسن التاني ديال ان الوطن غفور رحيم، رجع المغراوي وفأول خطوة ليه للتصالح مع موالين شي، ساند تعديل الدستور، وشد فيه بحال لاكارط بلونش، فأي حاجة وللى كيديرها كيدخل الدستور فيها حتى فهاد الندوة الأخيرة ديال محاربة التشيع راه من بين ما ستناقشه ” بين الدستور والتشيع”، ضروري يجبد الدستور باش يبان راه لا خطر منه، وأنه واحد باغي ياكل طرف ديال الخبز وصافي، هاد الشخص لي كان هارب فقضية فتوى زواج الصغيرة، عاد اليكم من جديد وعاد بحلة جدية مساندة للدستور وهاد المرة جاب معاه علماء من اليمن والسعودية ومالي.

واش أعباد الله واش حنا محتاجين من اليمنيين لي معركينها قات ولابسين غي زيف ديال حياتي فبلاصة السروال يجيو يعلمونا الدين وينورونا من خطر التشيع فالمغرب، أو حنا محتاجين لعلماء من أدغال مالي البلاد لي النص فيها مسيطرين عليه الجماعات الإرهابية يجيو يخلصونا من شرور الشيعة، مراكش لي معروفة كأهم قبلة سياحية للسواعدة لي باغين يفرحو لقريد يجيو عندنا خوتهم ينبأونا من خطر الشيعة، بحال الى أبو فاضل من ورا تسجيليه لفيديو الترمة المغربية ينوض يصلي بينا الجمعة فمسجد السنة، السواعدة لي كيمثلو أول حضور بشري فداعش وفكاري روج وأوتار، يولي ينورونا ويألبونا ونحرضونا على محاربة مغاربة بحالنا بدعوى أنهم كيشكلو خطر علينا فقط لأنهم مخالفين لنا فالعقيدة.

والجريمة الكبرى فهاد المهزلة هي استغلال واحد الفضاء لأسمى الفنون وأقدمها، من أجل الترويج للظلامية وللعنصرية، استغلال فضاء انساني راقي، من أجل الإنتصار للتخلف والتعصب والقبلية، كمغاربة راه مخرج تاحد للشارع يحتج ضد تالتدخل العسكري فاليمن، بنادم ملاهي مع طرف ديال الخبز ولي قالها سيدنا هي لي كاينة، اذن فراه الدولة ممحتاجاش بحال هاد المهازل الظلامية لي كتخليها تطيح فإزدواجية الخطاب، تعطي مساحة للشيعة فين يبانو ومن بعد تفتح التيران للسلفيين باش ينزلو عليهم، كنظن أن المغرب كبلاد تجاوز مثل هادشي، خليونا فموازين ومهرجان مراكش للفيلم وجيبو شاروخان لجامع لفنا وها الأمور غادا بيخير آش بغيتو بشي مغراوي أو بشي مقملين ديال اليمن ومالي والسعودية باركة غي أبو فاضل ومادار فينا