كود مصطفى الشاذلي ///
الماتش ديال الرجاء ودشيرة سالا بالشفرة، في مستودع ملابس الحكام، شي واحد دخل شفر الساك ديال الحكم وهرب، وخلاه مسكين بلا حويج.
الحكم داخل ادوش خرج ملقاش الصاك ديالو وخرج كيدور اقلب على الشفار، وشكون هز ليه الساك، غير بالفوطة، واخا البوليس كيكونو حاضين المستودع ديال الحكام، ولكن الشفار عرف كيفاش ادخل وشفر الساك وهرب.
الحكم ملقا ميلبس وخرج كيقلب على ساكو، وملقاهش وغادي اكون تسلف ملابس عند صحابو لي كانو معاه باش ارجع لدارو.
هاد السرقة هو أول حادث سلبي غادي اعرفو مركب محمد الخامس هاد العام، وهادشي السبب ديالو هو أن المنظمين كيخليو البراني انزل لتحت حدا مستودعات الملابس وتما فين كتكون الفوضى ديال بصح.
الماتش سالا زيرو لزيرو والحكم دار ماتش مزيان ولكن مشاو ليه حويجو وغادي ارجع كاعي للدار، بعدما سالا الماتش ديالو فرحان، خصوصا أنه باقي جديد في التحكيم ودار ماتش مزيان في ماتش كبير ديال الرجا.