حكيمة لعروسي كود /////

اول تجربتي مع الخمار بغيت نعاود ليكم اول تجربتي مع الخمار قبل ظهور النقاب، يمكن لأن بزاف الناس تايخلطو ما بين محاربة الغلو في الدين و التطرف في أي ديانة ومابين محاربة الدين نفسه، لهذا بغيت نوضح ليكم وانتوما تحكمو بنفسكم … اول مرة في حياتي نشوف الخمار شفتو في القسم ديالي ، كنت تانقرا في الرابعة اعدادي ماعليا مابيا حتى دخلت للقسم لقيت صف فيه بنت واحدة لابسة الخمار والباقي لابسين الحجاب اللي من بعد كلهم لبسو الخمار جالسين في عزلة على الصفوف الاخرى اللي كانو فيهم البنات ( المتبرجات) ، مالاحظت والو ديك الساعة العقل خااااوي فيه غير اللعب و حفظ الاغاني وياربي مايعطيناوش التمارين بزاف وياربي ماتكونش الأستاذة قبيحة ….

ولكن واحد النهار لفت انتباهي ان هاداك الصف ماتايهضرو مع تاواحدة فينا ، تايتجمعو بوحدهم في الساحة في القسم و تايهضرو باللغة العربية و ديما مكحلين عينيهم وملي تاتقوليهم شي واحدة منا السلام ماتايجاوبوهاش، أما أنا فحدث بلا حرج كانو تايشوفوني من كفار قريش ، خصوصا أنني من صغري وأنا تانلبس الميني ودجينات والكولونات … لبسي جزء من شخصيتي من صغري …

المهم أول مرة كانحس بالتفرقة في القسم بسبب اللبس مع ان السنة السابقة كان عندي صديقات لابسين الحجاب و تايموتو عليا ، ولكن داك العام صدموني هادوك البنات اللي سماوهم بنات القسم فيما بعد ( الحزب) ، واحد النهار دخلت للفيستيير وهوما ماكانوش تايلعبو الرياضة دايرين شهادة طبية طول العام لأن كانو تايقولو لبس الرياضة إباحي ، المهم دخلت قلت السلام ماجاوبونيش ماكنت من العاكزين مشيت عندهم وقلت ليهم احنا بنات قسم واحد تقدرو تقولو ليا علاش ماكاتجاوبوش السلام ؟ بقاو تايشوفو في بعضياتهم وماقالو والو قلت ليهم معاكم كانهضر ولا صمكين السلام ديال الله والدين تايقول ردو التحية بأحسن منها والرسول ( ص ) كان تايتعامل مع اليهودي و مع المسيحي ومع الكافر بالحسنى وكان تايرد التحية وهاد التصرف ديالكم ماشي تايدل على التدين ولكن تايبين انكم قلالات الأدب ومامربيينش ، حيث كلنا تانجلسو مع بعضياتنا في القسم أكثر ما تانجلسو مع والدينا في الدار وهاد التصرفات ديالكم ماكاتعجبني لا شوية لا بزاف ايلا طلبتيني نوريك أو نفهمك شي حاجة في القسم خصوصا أنكم كسالى في التربية الاسلامية حيث انا تانجيب فيها 18/20 وأنتوما كايعطيوكم نقط غير على تنظيم الورقة ماغاديش نقوليكم لا حيت كلنا زملاء فهمتو ولا لا ومشيت بلا مايقولو تاشي جواب …

هادشي وقع في اول أسبوع في الدراسة … اليوم الثاني لقيتهم تايقولو ليا السلام !! القسم كلو استغرب ، وبديت كانهضر معاهم ، كنت تانهضر في مواضيع مختلفة معاهم ولكن هوما كانت كلمتهم الوحيدة ليا ديري الخمار اختي حكيمة انتي قلبك زوين ومؤمنة لا ينقصك الا الخمار ، وتايكون ردي عليهم وأنا تانضحك وانتوما قلبكم مازوينش ولكن دايرين الخمار مع أنه غير مفروض علينا ، واحدة واللي هي الليدر ديالهم عائلتها كاملين تايهضرو باللغة العربية جابت ليا آية (( ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما ( 59 ) ) و قال الله تعالى : ( وليضربن بخمرهن على جيوبهن )و انا نقوليها الجيوب هي الشق بين الثديين والخمار يلف الرأس والعنق ويتدلى ليخفي ويغطي الصدر ولا يخفي الوجه. ماشي سمعتو الجيوب وانتوما تصحابوهم جيوب الجلباب بقاو تايشوفو فيا .. وبعد مناقشات عديدة اقتنعو بأنهم يقبلوني كيفما أنا و وليت عزيزة عليهم وولاو تايسلمو على باقي بنات القسم و تايهضرو معانا عادي جدا اللي بغيت نقول أن المشكلة فيهم هوما اللي مامتقبلينش يهضروا معانا ( المتبرجات ) هوما اللي تايشوفو نفوسهم دعاة وأحسن مننا، وهوما اللي تايقولو احنا وهوما …..

أما انا عندي عادي وعندي صحاباتي محجبات، ولكن ماعندي تاصاحبتي منقبة أو بالخمار وانتوما تقولو علاش ؟؟ !!! انا ماعنديش مانع سولوهوم هوما علاش عندهم مانع وان كنت عاصية من الضالين فالله يهدي من يشاء وباب التوبة مفتوح ياك ؟ ؟ وسولوهوم علاش تايعايرونا وماكرهوش يرجمونا !!!!
يتبع رسائلي للكبار فهما لا الكبار سنا الله يجيب اللي يفهمنا ولا يعطيناش