احمد الطيب الرباط /////
قضية بنحماد والنجار غادية وتبعد على القضية الاصل. جوج من اكبر محاربي الحريات الفردية في جماعة الاصلاح والتوحيد كيديرو ما ينهون عليه. الفرقة الوطنية والدرك والنيابة العامة والمجتمع والمحاكمة. القضية ما بقاتش غير هنا. ديما باش كتكون شي حاجة بريئة ولا مخطط لها عادية فالبداية ولكن باش كتبدا شي امور كتظهر كتفقد هاديك القوة ديالها.
قضية بدات وتفجرات وطبعا من حق الصحافة تهتم بها بل هنا عندهم الزهر فالمغرب اللي ما عندناش صحافة صفراء بامكانيات كبيرة بحال بريطانيا ولا اسبانيا ولا المانيا. كون قلبو مزيان مزيان حتى يجبدو ماشي غير حنش شي كوبرا. يعني اعلاميا من حق الصحف تناول هاذ الموضوع واثارته حقاش هادوك ماشي اي ناس. هادوك عندهم مكانة وشخصيات عمومية وعندهم اتباع كثر. هاد القضية ديال التناول الاعلامي اللي بداو شي ناس كيفتيو فيه نكولو ليهم ديوها فخدمتكم وخليو عليكم التنظير فالصحافة. طبعا كل واحد وزاوية المعالجة. اللي كيدافع من حقو اللي كينتقد من حقو اللي خدا مسافة من حقو.
المشكلة بدات مللي مثلا٬ صحافيون من اسبانيا كتوصلهم مقالات مكتوبة باسبانية مزيانة. نفس الرسالة المقال وزعت على صحفيين كثر. وقد بعث احد الصحافيين نسخة منها الى كود. هاد الرسالة المقال فيه تفاصيل القضية. لو ان اللي ورا هاد الشي خصم سياسي غادي تجيك غريبة حقاش الخصم السياسي ما رابح والو من تشويه الذراع الدعوي للعدالة والتنمية قبل شهر ونصف من الانتخابات. الاسبان ما كيصوتوش. اذن هاد الرغبة في تشويه الاسلاميين ماشي بريئة. علاش ما يخليوش الصحافيين يقلبو على لخبار. ياك كاينين مراسلين وكاين مكتب ديال ايفي فالرباط وهما عارفين خدمتهم. علاش هاد الشي كلو. طبعا من بعد هادا كاين واحد اسمو التيجيني جابوه حطوه فالتلفزيون وعطاوه برنامج. هاد السيد سب الرئيس المدير العام فيصل لعرايشي ومشى وجا يعني ان لعرايشي كيخاف منو. فقيهو صحيج بزاف بزاف واخا لا موهبة لا ابداع فبرنامجو. هاد السيد حتى هو دخل قمقومو فهاد القضية. باش بحال التيجيني كينظر فالاخلاق ما بقى كلام
