اعدها مصطفى الشادلي ///////

ماشي كاع لمغاربة باغيين الاسود يتألقو ويمشيو بعيد فكأس افريقيا للامم المقامة فالگابون. كاينة واحد العينة من القواسة كيتفرجو وكيتمناو غير الخسران للمنتخب ومنهم شي وحدين ما كيعجبهمش نجاح اي حاجة عندها علاقة بالمغرب.

حنا ف”كود” حصرنا هاد القواسة فعشرة صافي. يمكن الواحد يجمع اكثر.

1= المعارضين للنظام الملكي من اليسار الراديكالي الى الاسلاميين الرافضين للعبة الديموقراطية. هاد العينة ما عندهاش مشكلة مع كرة القدم ولا المنتخب بل عندها مشكلة مع النظام الملكي. كلشي كترجعو سياسة. ربح المغرب كيقولو النظام غادي يستافد وغادي يوظف هاد الانتصار لصالحو. ديما فتدوينات ناسهم هاد الهوس بالنظام من الكرة حتى الثقافة ودوز على السياسة والاقتصاد ….كيعتابرو رباح المنتخب وتأهله انتصار للملك ماشي للشعب المغربي.

2= بادو الزاكي المدرب السابق للمنتخب المغربي اللي تلات بيه اليام ومشى كيدرب بلوزداد فالجزائر. هاد المدرب عندو عقدة فحياتو المهنية. ما عمرو ربح شي لقب وباقي عايش على تاريخ بلوغ المنتخب المغربي النهائي في كأس افريقيا بتونس ف2004. كان مدرب للمغرب قبل الفرنسي رونار على هاد القبال الزاكي ما كرهش هاد المنتخب اللي خلاه كلو مضاربة٬ يخسر. ما بقوتش الدور الاول. كيهمو غير راسو.

3= المدربون المغاربة الفاشلون= هادي واحد العينة من المدربين. تلقاه فاشل فتدريب اصغر نادي فالمغرب وفالتلفزيون كيولي خبير كيفهم. بعد ما نصح فكأس العالم كبار المدربين طبعا فالتلفزيون ولا الاذاعات الوطنية٬ فهاد الايام كيخرجو علينا ويبداو يعطيو الدروس. هادو عندهم عقدة مع الاجنبي. عارفين باللي المدرب الاجنبي احسن منهم ولكن ديما كيديرو الشعبوية وكتلاقاهم يتشكاو علاش كياخد بزاف. هادو باغيين رونار ما يمشيش بعيد مع المغرب. باغينو يتقصى.

4= زيد عليهم شي صحافيين رياضيين. عينة منهم. كيوليو باغيين المنتخب المغربي يخسر مع الكوت ديفوار لحقاش الجامعة الملكية لكرة القدم سادة عليهم وما عرضاتش عليهم يمشيو على حسابها للگابون. كتاباتهم ديما نقد ديما احتجاج ديما بكى ديما دروس. فالعالم الصحافيين الرياضيين اللي كيتبعو المنتخبات معاها فين ما مشات ديما كتحركهم المهنية ما كاينش ريحة الانطباعات فكتاباتهم. ما كاينش الدروس المجانية. هادو باغيين المنتخب يخسز باش يعرضو عليهم فالاذاعات والرياضية ولا يكتبو فين كيكتبو وكيقولو ها اللي قلنا. ما كاينش استراتيجية. ما كاينش تكوين ما كاينش ما كاينش

5 = عبد الله نهاري. هاد السيد كيفهم فكلشي. هاد لفقيه كيجيب خبار ومعطيات كاذبة وكيصدقها غير بوحدو وكيبني عليها تحليلو الشعبوي. كاليك اللعابة غاديين ياخدو مليون دولار. السي لفقيه اولا اذا جاءكم فاسق بنبأ فتبينوه ان تصيبكم جهالة وثانيا على فرض انهم كياخدو هاد الفلوس راه كيستحقوها. الجامعة راها غنية وبزاف بالمستشهرين وهادوك اللعابة مرفحين بزاف وخلاو اغراءات كثر من فين يقدر يمشي خيالك وختارو المغرب. هادا ايلى خسر المغرب فرصة يجي يقول قلت ليكم هادو فيهم وفيهم ويدخل الدين كالعادة في ما يشبه تحليل اللي هو غير الغباء وصافي

6 = معارضو فوزي لقجع فالجامعة وخارج الجامعة= كاينة واحد العينة ضد رئيس الجامعة الملكية لكرة القدم فوزي لقجع. كاين اللي ضدو فالجامعة حقاش كان محسوب على علي الفاسي الفهري وعاش العز فايامو وباغي يبقى عايش معاه لذا باغييه يخسر باش يمشي فحالو ويرجع يتمعش وكاين اللي كيعارض لقجع خارج كاع من الجامعة. شخصيتو الطوبيسية دارت ليه اعداء كثار. ما بغاوش المنتخب يربح باش ما تحسبش للقجع

7 = اللعابة المحليين للي ما عندهمش بلاصة فالمنتخب. هادو حتى هما مقوسين على المنتخب ما باغينوش يربح ولا يفوت الدور الاول. ديما مخرجين اسطوانة اللاعب المحلي. اودي اللاعب المحلي ما فرجلوش ما صالحش الا للبطولة المغربية. فيهم واحد ولا جوج ولكن راه هاد الشي اللي عطى الله. واخا تقوسو وظلو تقوسو ما عمركم طفروه ولا تلعبو فالمنتخب. مستواكم ماشي ديال المنتخب غير بقاو تقوسو

8= اللعابة لقدام ديال المنتخب. هادوك كلاو وسافرو فدرجة الاعمال وسكنو فلوطيلات الواعرين. كلشي حقاش مشى ليهم هاد الشي وعلى هاد القبال باش يرجعو امتيازاتهم غادين يقوسو على المنتخب. غادين يبغيوه يخسر. هادو كانوا ابطال واحد الوقت ولكن اللي كيهمهم هو ميمي وفلوس الجيب

9= فئة من خوتنا الجزائريين اللي ضد يربطو شي حاجة ناجحة بالمغرب. خسارتهم مع التواتسة بجوج لواحد خلاتهم يتمناو المغرب يخسر. هادو غادين يقوسو على المنتخب باش يلعب مع الكوت ديفوار. ايلى كانو سياسييهم ضد عودة المغرب للاتحاد الافريقي فيستحيل يقبلو الاسود كيربحو ولا يتاهلو للدور الثاني

10= القواسة ديال الفايسبوك. هادي عينة من لمغاربة اعداء النجاح. فين ما كانت شي حاجة مزيانة ضدها. حقاش فهاد البيعة والشرية كيحققو ريوسهم والناس كتهدر عليهم وكيبانو واعرين. فالرباحات كيغبرو كيمشي ليهم راس مالهم. ديما مقوسين خاصة فالمناسبات المهمة اقصائيات كأس العالم وكأس افريقيا.