سهام البارودي- كود /////

—
فاش كنت كانقرا فالليسي و حيت كنت قراية و داخلة سوق راسي و كانعرف غي الكتوبة و لانتيرنيت (يامات ياهو و الميرك و كاراميل)كنت عزيزة على الأساتذة ! و فاش كاتكون قراي و قافز كاثير اهتمام الأساتذة, لي عندو شي نادي ديال البيئة كايحاول يستقطبك ليه، لي عندو نادي ديال المسرح كايحاول يدفعك دير المسرح ! لي منتمي لشي حزب كايحاول يدخلك معاه! لي عندو شي فكر كايحاول يزرعو فيك ! دايرين فحال دوك les chasseurs de têtes كايصيدو النقيلات لي يمكن يخدمو المشروع السياسي و لا الديني و لا الحزبي لي هوما مشاركين فيه حيت كايشوفو فيك une bonne recrue ! قراي واحد النهار غاتولي طبيب و لا مهندس و لا إطار كبير غايخدم المشروع … داكشي علاش كايربيوك على يديهم و نهار كاتوجد كايطلقوك.

كانت عندنا واحد الاستاذة ديال العلوم الطبيعية مكلخة شوية ! الاستاذ المكلخ هوا لي كايكون راسو عامر بالمعلومات و لكن ماكايقدرش يدوزهم ليك ! هاد السيدة كانت من داك النوع ديال الأستاذات لي دايرين الزيف و كايلبسو الصايات طوال و التريكوات ديال الصوف مهلهلين ! ماكاديرش الريحة طبعا فيها ديما ريحة المسمن بالزبدة … كليشي ديال دوك بنات لافاك الدرويشات لي كاينجحوا فالكونكور ديال لينيس و كايوليو أستاذات كايتجوجو بشي استاذ و كايكونو اسرة صالحة !

كنت عزيزة عليها !واحد النهار جات عندي مورا الحصة أنا و واحد البنت كانت تاهي قراية دابا راه ولات طبيبة و سولاتنا ” واش ممكن تجيو عندي للدار نهار السبت فالعشية ؟” قلنا ليها واخا آ أستاذة نشوفو مع واليدينا و نجاوبوك !
لي عقلت عليه أنني مامشيتش داك السبت لديك العراضة ديال الاستاذة واخا العراضات ديال الاساتذة قلال و بالنسبة للتلاميذ راه شي حااااجة كبيرة يعرض عليك استاذ لي نتا موالف كاتشوفو غي فالمدرسة تمشي لدارو و تشوف فراشو و ماكلتو و حياتو الشخصية ! فحالا عرضات عليك مادونا دوز معاها الويكاند فالهونولولو !

نهار الاثنين فاش تلاقيت بديك البنت صاحبتي لي مشات سولتها آمدرا كي داز داكشي و شنو درتو ؟ ، جاوباتني
” بلا ماتفكريني ! ناري شحال بكينا داك النهار”
تصدمت مافهمتش الجواب ديالها! آش جاب البكا للهضرة ؟
“وايلي ؟ كيفاش بكيتو ؟”
البنت قالت ليا من بعد بلي الأستاذة كانت موجدة درس ديني فدارها و عارضة على بزاف ديال “الأخوات” من جماعة العدل و الاحسان، موضوع الدرس كان هوا ” البعد عن الله” و فهمت بلي ديك لي دارت الدرس بدات كاتفكرهم بشحال هوما بعاد على الله، مذنبات، عاصيات، و كاتحك على الدبرة و كاطيب ليهم فقلبهم و الحمقات كايدمعو و هي كاتزيد فيه و هوما كاينحطو و هي كاطلع النيفو و هوما كايتنخصصو … مهم دزوات عليهم عشية السبت فحالا حاضرين للجنازة النحيط و التنخصيص و شهق بكي شهق بكي تاتنفخو لطاسيلت مهم العينين و داعاو مع بعضياتهم و فركتو الجقلة ! و نعم الصامدي سوار ديال الخوانجية ! دوزام كاتجيب حجيب باش تفوج على الشعب و الخوانجية كايجمعو الشعب باش يديرة جلسات جلد الذات و النحيط و التهرنين.

وانا نقول مع راسي وا لايني بلان هادا ! مالي ؟ مسالية قبي ؟ نمشي نبكي مع عشرين ديال الخلق نهار السيت فالعشية ؟
آشمن ذنب غاتكون دارت بنت خمسطاشرعام گاع ؟ باش تلقا راسها وسط جماعة ديال العيالات كاتسلخ فراسها و كاتبكي؟

وا هيا ناري راني مقصرة!؟
وا هيا ميمتي راني مذنبة؟
وا هيا راني عاصية؟
شوف الروكريتمو كي داير ! جيب برهوشات كايقراو مزيان ! عزلهم على الاسرة و المجتمع ! دير ليهم جلسات نحيط جماعي! و جلسات ذكر جماعي و جلسات قرآن جماعي و جلسات موعظة جماعية و مسح لدينمهم الشخصية ديالهم و ديك الفردانية لي كاتميز واحد على واحد و فورماطيهم و خليهم حوالا تابعينك ! كاتقول بااااع كايقولو تاهوما بااااااع

المهم القصة ديالي مع ديك الاستاذة ماحبساتش هنا حيت عرضات عليا شحال من مرة من بعد حتى لواحد النهار قلت ليها” أستاذة ماما مابغاتنيش ننتمي لجماعة محظورة”
حسيت بيها تصدمات من الجواب ديالي ! حدها هزات فيا عينيها و جاوباتي
“الحق ديما محظور”
و من تما ماعاوداتش معايا الهضرة ولا حاولات تقرب جيهتي.
هاد الجملة ديال “الحق ديما محظور” بقيت عاقلة عليها ! حيت كنت دوزت شي يامات وانا كانفكر فيها؟ كيفاش الحق ؟ و شكون قاليهم عندهم الحق ؟ و لاكانت الأستاذة على حق و الجماعة على حق و الشيخ ياسين على حق ؟
واش حنا لي ماشي من الجماعة على باطل ؟
للأسف الاستقطاب ديال الجماعة فشل معايا! و لكن نجح مع بزاف ديال الناس لي غايكونو اليوم كايشوفو راسهم على حق ! و تاهوما كايقولو ” الحق ديما محظور”