الرئيسية > آراء > نتافقو معاه و لا نختالفو معاه كايبقا بنكيران عندو واحد الكاريزما لي كاتخلي كاع دوك الخصوم لي كايحاولو يقلدوه يبانو قدامو بهلوانات !السيد خلق ستيل ديالو بوحدو و الخطأ القاتل لي كايطيحو فيه الخصوم ديالو هو محاولة التقليد
03/09/2015 08:05 آراء

نتافقو معاه و لا نختالفو معاه كايبقا بنكيران عندو واحد الكاريزما لي كاتخلي كاع دوك الخصوم لي كايحاولو يقلدوه يبانو قدامو بهلوانات !السيد خلق ستيل ديالو بوحدو و الخطأ القاتل لي كايطيحو فيه الخصوم ديالو هو محاولة التقليد

نتافقو معاه و لا نختالفو معاه كايبقا بنكيران عندو واحد الكاريزما لي كاتخلي كاع دوك الخصوم لي كايحاولو يقلدوه يبانو قدامو بهلوانات !السيد خلق ستيل ديالو بوحدو و الخطأ القاتل لي كايطيحو فيه الخصوم ديالو هو محاولة التقليد

سهام البارودي كود ////

نتافقو معاه !نختالفو معاه ! شعبوي و لا شعبي! كايبقا بنكيران ظاهرة بامتياز !هادشي لي كانشوفو فاش كانتفرج فالخطابات ديالو و لا فاش كانشوف التصاور ديال دوك الجماهير الغفيرة لي كاتسمع ليه ! بنكيران بغض النظر على الانتماء ديالو السياسي و على المركز ديالو كرئيس حكومة كايبقا واحد الشخصية لي قسمات تاريخ الحياه السياسية فالمغرب على جوج : ما قبل بنكيران و ما بعد بنكيران …

علاش؟ حيت السيد عندو واحد الكاريزما خطيرة لي واخا كايحاول اي واحد يقلدها ماكاتجيش معاه ! حتى من الاعداء ديالو و الخصوم ديالو كايحاولو يتشبهو بيه و يديرو فحالو باش يولي عندهم ديك الشعبية لي عندو، شباط، مزوار، بالخياط، لشكر، الباكوري …كلهم كايحاولو يتشبهو بيه و لكن كايبقا بنكيران اصل و الباقي تقليد، كاتحس بيهم مزيرين ، مقجوجين، كايمثلو دور ماشي ديالهم، فحال الممثلين المغاربة ديالنا فاش كايعطيوهم يمثلو دور واحد لاباس عليه و خامج فلوس و كايبقاو يهضرو بديك الفرونسي مخضرة باللفت ديال “موا باغتيغ افيك طوا” وكايشدو السيغار عوج…حيت ماموالفينش ! بنادم كابر فالحزقة و ماقاريش فلاميسيو النطق ديالو ديال الفرونسي كايبان مفروط ماموالفش يدوي بيه غي تلاح بلا سروال … نفس القصة كاتوقع لخصوم بنكيران! لي المشكلة ديالهم انهم ماكايحاولوش يميزو … يخلقو اسلوب ديالهم…يخلقو نموذج خاص بيهم! لا كلهم بغاو يشبهو لبنكيران و يضحكو فحالو و يهضرو فحالو و يتمازحو فحالو …

و هادشي لي كايخليهم ديما موراه ! كايبقا بنكيران كووم و بنادم لاخور كامل باليسار و اليمين و الوسط كلهم كوم ثاني ! السيد راه من ناحية “الماركوتينغ” وبعيدا عن اي تعاطف معاه او مع حزب العدالة و التنمية كايبقا عندو une image de marque ديالو لي صعيب شي واحد يقلدها ! عندو الكاريزما لي كاتشكل بالنسبة ليه (كيما كايسميوها ناس الاقتصاد) avantage concurrentiel فحال الوصفة السرية ديال كوكا! بنكيران الوصفة السرية ديالو هي الكاريزما لي كاتخلي اي واحد صعيب عليه بزاف ينافسو و باش ينافسو راه ماخاصوش يقلدو و يوقع فالخطأ القاتل لي وقع فيه كلشي، خاصو يبدع اسلوب جديد و يلقى شي حاجة مميزة لي تقربو من الناس و تخليه يدير بلاصتو قدام بنكيران.

السيد تقدر تختالف معاه فالافكار و لكن كايبقى عندو السبق انو وصل سميتو لكاع الفام ! كلشي كايعرفو الصغير و الكبير، من الشمكار تال لوزير ، و تاهادوك لي ماحاملينوش كايقولك ” وا بنكيران مادار لينا والو” ، فين عمر شي واحد جاي من ورا الشمش قال ” وا جطو مادار لينا والو ” ” الفاسي الفهري مادار لينا والو ” حتى من الاسم ديال الوزير الاول راه كان محصور عند النخبة و شي ناس قارين و واعيين و كايعرفو … الاغلبية الساحقة ماعمرهم دواو على شي وزير اول /رئيس حكومة فحال لي كايدويو ليوما على بنكيران لي ولا ماركة مسجلة! انسان لي حتى الناس لي ماكايتافقوش معاه فحالي يمكن يشهدو ليه انو خلق الفرق ،تميز، كاتسمع ليه كاتحس بيه كايهضر من نيتو … خلق شي حاجة لي ماكانتش ! الرجل فينومين بوحدو فاش تاتسمع ليه تاتبع معاه الهضرة ماكاتجيكش القنطة لي كاتجيك و نتا كاتسمع للخطابات ديال الخصوم ديالو ! العربية ديالو مامعكلاش، عندو سرعة البديهة و كايتراد مع الناس لي كاينقزو من هنا و هنا باش يلوحو ليه شي نويطة و هو كايهضر و كايرد عليهم بطريقة ذكية …

بنكيران عندو مقومات السياسي الامريكي ! لي كايسير للخطابات ديالو بعيدا عن لغة الخشب و ما فتئ و ما انفك و لكن و لذلك و… بنكيران تاتفرج فيه فحالا كاتفرج فشي وان مان شو ! تاتفرج و تاتمتع …

الكاريزما راه واحد الحاجة ماكاتباع ماكاتشرى ! يا عندك يا ماعندكش ! تقدر تاكل الهندية مع الشعب، تتصور مع مول الديطاي، تشطح مع الحيدوس، تلبس الرزة د جبالة… راه لاماعندكش الكاريزما لي تخلي بنادم يشوفك و ينباهر قدامك غاتبان كي شي كلون و صافي ! كلون داير الحلقة و كايحاول يضحك الناس بلي كان !

احذروا التقليد ….راه اهم حاجة خاصها تكون عند السياسي هي الكاريزما !

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه