حكيمة لعروسي كود .//////

بغيت نحكي ليكم قصتي مع الحقد الطبقي والغيرة لأني ديما تانتساءل واش أنا اللي غريبة حيت ماتانغيرش من اللي احسن مني أو أنا طبيعية والناس اللي غرباء … ؟؟ هو سؤال فلسفي وأي إجابة عليه غادي تكون نسبية ولكن رغم ذلك غادي نبقى نقلب على إجابات ونطرح أسئلة ….

أولا أنا بالمفهوم المغربي بنت الشعب وبنت حي شعبي ماعندناش وماخصناش الحمدلله
كنت تانقرا مع بنات مستواهم المادي ممتاز وكنت تانمشي معاهم لديورهم باش نحفضو أو لمجرد الزيارة والتعرف على الأهل دخلت لفيلات وإقامات بحال الخيال ولكن ملي كنت تاندخل تانعامل عادي جدا ماتنبقى نشوف وتنهد ماتنحسدهم ما تانغير منهم بالعكس تانفرح أن عندي صديقات بهاد المستوى كيفما تانفرح بصديقاتي اللي ضريفيين وعايشين في ظروف قاسية لا فرق عندي .. ماعمرني كنت طماعة ولا إستغلالية كانو بنات قسمنا كلهم صحاباتي مع الفروق العقلية و الإجتماعية إلى أني كنت تانوحد القسم كلو في دقيقة على كلمة واحدة حيت قسمنا كانت كل مجموعة بوحدها ولكن القاسم المشترك بينهم أنا كل واحدة فيهم ممكن تحكي ليا مشاكلها وأسرارها بكل صراحة وبكل ثقة أنني غادي نكتم السر ونساعدها إيلا قدرت وكانو تايسميوني الزعيمة بمفهوم ماما حكيمة وخا كلنا عندنا نفس السن …

كنت تانفتاخر نمشي في الزنقة مع صديقة لو هي أجمل مني وملي تانشوف الناس تايشوفو فيها تانفرح وتانقول أكيد كلهم يتمناو يكونو أصدقائها وتانبغي نقوليهم بصوت عالي راه هاد الغزالة تاتعتبرني ختها وأنا أقرب صديقاتها وحتى إيلا كانت غنية وكل البنات حاسدينها تانلقى راسي فرحانة ليها وتانقول الله يغنيها ويزيدها … عمرني ماحسيت بالغيرة إلا على راجل ممكن نبغيه طبعا نبغيه ليا بوحدي .. وحتى مع إخوتي ماعمرني غرت من مكانة شي حد فينا عند الوالدين بالعكس كنت تانبقى نضحك ملي تانعرف أمي أعز ولادها عندها خويا والأب ديالي أعز بناتو في قلبو أختي لكبيرة …تانبغي خوتي كاملين ونعطي عمري عليهم .

وحتى في مجال الرقص تانشوف الحقد والغيرة ماتانفهمش علاش ؟؟ المفروض أننا فنانات يعني الحس المرهف والقلب الطيب المفروض تانشرو السعادة وتانعلمو حب الحياة وحب الغير .. شحال من مرة تانكون في مهرجان تانشوف بنت كسوتها زوينة أو رقصها جميل تانمشي عندها وتانقولها ليها بكل بساطة ومن قلبي تانتمنى ليها الخير و تاندافع عليها إيلا سمعت شي حد تايتكلم عليها لانه تايغير منها .. مثلا صافيناز ملي طلعات هاجموها بزاف ولكن أنا اتصلت بيها وعطيتها نصائح أخوية وقلت ليها هاد الحرب ضريبة النجاح ومجرد غيرة كملي في طريقك واللي سولها عليا تاتقوليها حكيمة جدعة اوي أنا بحبها ..

لحد الآن ماعرفتش علاش أنا ماتنغيرش من اللي احسن مني على أي مستوى ، يمكن لأن عندي ثقة بنفسي وماشي مهزوزة وعلى يقين أن هاد العالم فيه اللي أحسن مني وفيه اللي كفس مني خاص غير نتعاملو بإنسانية وبلغة العقل والمنطق مايمكنش نعجبو جميع الناس ومايمكنش الكل يكرهنا ، وحتى في وجود نساء أجمل وراقصات أحسن مني هذا لا يمنع أن هوما ليهم جمهورهم وأنا ليا جمهوري ، قليل أو كثير عندي حقي ، إذن علاش الغيرة ؟؟ ولعلمكم الغيرة تدمر النفسية وتحد الإبداع وهي أكبر عدوة للنجاح لأنها تشغل التفكير بالأمور الخاوية وتعجزه .. اللي بغى ينافسني مرحبا على المسارح المجال مفتوح للجميع أما الغيرة والحروب الخفية فهي تدمر صاحبها فقط و تزيد من إصراي على النجاح ..

انا ماشي مثالية عندي عيوب كثيرة ولكن ماشي من ضمنهم الغيرة و الحسد ..

رسائلي للكبار فهما لا الكبار سنا .
الله يجيب اللي يفهمنا ولا يعطيناش .