احمد الطيب الرباط ////
واش هاد الناس اللي ورا الفكرة البليدة ديال متابعة حميد شباط الامين العام لحزب الاستقلال عندهم لعقل. واش هادو رجال دولة. راه شوهة كبيرة ما بعدها شوهة. وزارة الداخلية ما عندهاش الحق تتدخل فالنقاش السياسي. وزارة الداخلية دخلات نيفها فامور ماشي من مهامها نهار خرجات بيان اللي هو مقدمة لهاد العبث ديال الاستماع للامين العام لحزب الاستقلال من قبل الشرطة. البيان اللي در على مقال صادر فموقع الحزب ما كانتش وزارة الداخلية اللي كتكلم بل دولة. باي حق تقيم هاد الوزارة فترة حميد شباط. هادا راه حزب قدم من وزارة الداخلية وعندو ديموقراطيتو. الامين العام عندو مناضلين يحاكموه يقيمو تجربتو يصوتو عليه او يعاقبوه.
وزارة الداخلية البليدة فهاداك البيان فاتت مهمتها. هاداك البيان اللي بغاو يقتلو بيه شباط كان هو محفز الاستقلاليين على التشبث به.
مقال حزب الاستقلال اللي هدر على وادي الشراط وجبد مواضيع اخطر ما خاصوش تحقيق مع الامين العام حقاش هاد الامين العام ماشي هو مدير النشر. الهدف كان باين هو يدلو شباط.
دابا هاد الاخير وضد كلشي اللي دارو ليه زاد فشعبيتو. استعملو معاه تقريبا نفس الاساليب باش يضربو بنكيران وكلها بينات فشلها. شوفو كيفاش استعمل الاستنطاق ديالو وجات الصحافة ودار علامة النصر وكرر باللي الحزب هو المستهدف.
حزب الاستقلال كيسب براسو مستهدف. بان هاد الشي في ما يحدث. حتى فجنازة امحمد بوستة هاداك الغبي اللي بغى يدعم نزار بركة نسيب حميد شباط غير كيخربق. هاد الشي ما فيهش ندعم هادا او داك. من غير الاشكال القانوني اللي كيمنع نزار يترشح حقاش منصب الامين العام وفق القانون الحالي لحزب الاستقلال ما يمكنش يترشح ليه الا عضو اللجنة الادارية =وشحال باش يبدلوه= هاد النسيب بعيد على الحزب بعيد على هياكلو. الفوز بالامانة العامة لحزب الاستقلال يمر عبر ربح ثقة حمدي ولد الرشيد منسق الحزب في الجهات الثلاث وقيوح راجل الحزب فسوس. هادو عندهم ثقل كبير. بجوجهم كيدعمو شباط واخا كانو مع فكرة امين عام جديد. حقاش شافو جهات فالدولة كتدخل فالحزب وكتدخل حتى فيهم =حالة حمدي ولد الرشيد اللي رجعات مشاكلو مع والي جهة العيون بوشعاب يحضيه=
حميد شباط قال فتصريح سابق ل”كود” باللي باغي يترشح. هاد الموقف خربق كلشي. هاد الناس لفهايمية اللي استهدفوه وصلو لنتائج عكسية. مازال قدامهم وقت باش اولا يساليو هاديك التمثيلية البئيسة ديال متابعة شباط راه عندو حق. راه متابعة سياسية غير مسبوقة فتاريخ المغرب. اواه الداخلية كتسب فيه صحف كتسب فيه الطيب الفاسي الفهري مستشار الملك وابن اخت عباس الفاسي جا للتلفزة كيسب فيه. وقفو العبث راكم وليتو ضحكة ورجعو هاد الديموقراطية العوجا عندنا ضحكة. واش فهاد الوقت تضحكو عليكم لمغاربة.
