كود احمد الطيب واسماء غربي /////
خرجة احمد العمراوي الكاتب العام للمنظمة الديموقراطية للصيد البحري ديال المنظمة الديموقراطية للشغل ديال البام في مناظرة نظمتها جهة طنجة الحسيمة حول الحسيمة وحراك الريف قبل ايام ضرت كثيرا بالحزب. كيفاش؟ العمراوي تحدث عن مافيات فصيد التونا. كان يقصد يوسف بنجلون رئيس غرفة الصيد البحري المتوسطي اللي من البي جي دي ويوسف بن جلون وهاجم وزير الصيد البحري والفلاحة عزيز اخنوش وقال باللي ما دار والو للصيد البحري وجبد عكاشة ديال الاحرار اللي عندو استثمارات فالحوت وداز على الكولونيل اللي ما بقاش ساوش اللي حتى هو مستثمر فالبحر. هاد النقابي رسم صورة على ما يقع فالصيد البحري قاتمة. المافيا تتحكم في كل شيء والريع والفساد ووو. حتى باش تحدث على لقاء مع وزير الصيد البحري شهد رئيس فريق الاصالة والمعاصرة في مجلس المستشارين عزيز بنعزوز.
هاد الشي كان عندو تبعات وسياسية. بداو نقابات كيدافعو علي بنجلون وكيدافعو على القطاع. اول من خرج بيان نقابات مهنية كتخدم فالحسيمة. اللي شكل بداية للتحول هو ان بعض الموقعين من حزب الاصالة والمعاصرة. تبعوهم نقابيين اخرين واخر من التحق نقابات اخرى ومنظمات مهنية للصيد البحري في اعالي البحار والصيد الساحلي وحتى التقليدي. فيدرالية الصيد البحري التابعة للباطرونا في شخص رئيسها جواد الهيلالي حتى هي انضمت للمدينين لتصريحات العمراوي. هما فبيان صدر قبل يومين تحدثوا عن التوظيف السياسي. المثير فين كاين هو ان الهيلالي مثلا مع البام وكان ترشح معاهم فاخر انتخابات مهنية 2015 فالصيد البحري، يعني انتفاضة ضد البام.
البام وفق احد الخبراء المتتبعين لقطاع الصيد البحري٬ الى حدود تصريحات العمراوي كان يهيمن على 60 بالمائة تقريبا ديال المنظمات المهنية والنقابية فالصيد البحري اي عندو سيطرة مطلقة “البام عندو 9 هيئات و4 غرف جامعة الغرف المهنيين ونقابات. بعد تصريح العمراوي ناس البام ديال الصيد البحري فالحسيمة فكازا فاكادير فمدن اخرى دارو بيانات ضدو اي ضد الحزب ديالهم”.
المصدر قال ل”كود” ان غالبية هاد الناس “قراب بزاف ما يمشيو للتجمع الوطني للاحرار”. والسبب “من غير هاد التصريح الخطير اللي دار فجهة طنجة اي جهة رئيسها هو الامين العام ل”الاصالة والمعاصرة” الياس العماري٬ كاينة نقطة اخرى وهي ان المهنيين والنقابيين مع اللي غادي يفيدهم ويعاونهم. اخنوش دابا معاهم كيدعمهم واتوقع كلهم حتى اللي فاحزاب اخرى ينضمو لحزبو” يشرح مصدر “كود”.
دابا هاد الشي غادي يبان فالقريب ونشوفو شكون مشى وشكون بقى
