الرئيسية > آراء > مالكم ا”كود”: اييه من حق الطاهر بنجلون يعبر على رأيو علاش تصادروه ليه
05/12/2016 16:00 آراء

مالكم ا”كود”: اييه من حق الطاهر بنجلون يعبر على رأيو علاش تصادروه ليه

مالكم ا”كود”: اييه من حق الطاهر بنجلون يعبر على رأيو علاش تصادروه ليه

عبد اللطيف اكنوش استاذ باحث ////

الفرق الوحيد بين القايد الطاهر بنجلون الحساسبي ديال السلطان في القرن 19، وبين “الطاهر بنجلون” ديال جائزة “الكًونكور” هو أن هاذا معارض لابن كيران وماكايحملش “البيجيدي

هاذي مدة طويلة وخوكوم كايشوف بللي الطاهر بنجلون نازلين عليه الزغبي بالعصا وبالتمرميد مللي خذاه “جان بيار شوفينمنون” مستشار معاه في ذيك “المؤسسة ديال إسلام فرنسا”…كاين شي بعضين مشاو اجتهاهدو كًاع ولقاو شي قايد بكري في القرن 19 مسخوط الوالدين سميتو حتى هو “الطاهر بنجلون” كان حساسبي ديال السلطان، باش يكًولو ليك :”راه فين ماكان شي واحد سميتو الطاهر بنجلون مايكون غير خدام ديال السلطان وولد الزنا وما يسوا حتى بصلة”

هاذ الطاهر ديال دابا والله ماكانعرف حناه، ياالله قريت ليه شي تويشيات من كتاباتو، ومللي شفتو واحد النهار كايتكلم على شي “دورية” إدارية خيالية انسبها للجينرال أوفقير وكًال ليك بللي بيها باش عررب التعليم في المغرب، وأنا نسدد عليه ومابقيتش كانقراه بحال بززااف للي كايحسابو ريوسهوم “كتاب” عندنا….ولكن مع ذلك كانبقى كانحتارم السيد، لأنه ماشي غير فيق من النعاس وسير تاخذ جائزة “الكًونكور” الفرنسية !!

هاذ العشية قريت واحد التويشية في موقع “كًود” دايرين فيها واحد الفيديو ديال الطاهر بنجلون، هاذا للي مازال عايش، ماشي الحساسبي ديال السلطان ديال القرن 19، كايقول فيها بللي “المغاربة ماتربباوش على قيم الديمقراطية، وخاصة هاذوك للي صوتو على البيجيدي بحكم أن هاذ الحزب حزب رجعي، ومعادي للأجانب وللمثلية ومتزمت…إلى آخره”…وللي خايب في هاذ المقال ديال “كود” هو أنه باركين عليه ثاني بالشدان والسبان، وجابذين ليه ذيك المصيبة ديال الخدامة للي داها معاه لفرنسا شحال هاذي وكانت غاديا تدديه للحبس.مالكم سوقكم

من وجهة نظري، هاذ السيد عببر على رأيو…وقال بللي المغاربة “ماربباوهومش على آشنو هي الديمقراطية ديال بالصصح”، وعندو الحق مليار في المائة بالنسبة ليا، وبالنسبة لبزاااف ديال عباد الله….وزايدون هاذا رأيو وهو حر فيه، ومايتساهلش من شي ولد الزنا يصببن ويجفف بيه الأرض…لأن حتى هاذ النوع للي كايسبو ماترباش في الديمقراطية وماكايعرفش آشنو هي “احترام رأي الآخر”…

ويا الله…كًولو عليا دابا أنا راني دافعت على الطاهر بنجلون لأنني حتى أنا “حساسبي ديال السلطان”، وعميل ديال المخزن وديال “المجموعات المتحكمة” وذيك التويشيات للي كي يبغيو يرددوها ذوك للي كانيسميهوم “ولاد ممهوم”…وسيروا قللبو على شي “أكنوش” من القرن 19، راه غادين تلقاو غير البعابع…راه غير السمية ديال الشلوح القرففيين للي يطيرو حتى يعياو كايولليو “روكًيين” و”سايبين”…يااااه على قوم كيف داير !!!!!

موضوعات أخرى

28/03/2024 10:20

أزمة كليات الطب والصيدلة مزال غادية.. مجلس طلبة الطب بفاس: النضال ديالنا مستمر ومقاطعتنا المفتوحة قائمة

28/03/2024 10:00

تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون