سهام البارودي كود /////

بزاف د الممثلين و المشاهير و حتى سياسين مازكلوش هاد المناسبة د الجدل لي خلق الفيلم د نبيل عيوش باش يمارسو هواية الركمجة او السورف و يلمعو صورتهم و يبانو زوين قدام المغاربة ! او بالاحرى ديك العينة د المغاربة لي قالك ماعجبهمش الفيلم (واخا ماشافوهش) و فعلا فاللخر تمنع الفيلم !

تمنع الفيلم حيت لقا قدامو جيش د العقليات الداعشية لي حاكمات الفيلم بمعايير اخلاقية و ماشي سينيمائية!

تمنع الفيلم حيت لقا قدامو بزاف د الممثلين و الفنانين الحاقدين لي واش جاتهم الغيرة ؟ واش حسدو عيوش ؟ واش بغاو يبانو للجمهور راهم “زوينين” … و خرجو كايصرحو انهم ضد الفيلم مع انهم ماشافوهش ! و هوما يا حسرة اهل الفن و الابداع و الخلق … لي اغلبهم حمضو التلفزة بدوك الاعمال البليدة لي كايخرجو لينا …

تمنع الفيلم حيت جا مع الفترة د الانتخابات و كلشي باغي يدير بلاصتو و يبان كايدافع على “القيم و الاخلاق المغربية ” …

تمنع الفيلم حيت الاحزاب السياسية veut se refaire une virginité ! بالعربية تاعرابت ترقع البكارة ديالها و تبان مع الشعب ، الشعب لي دار باج ففايسبوك سماها ” معا من اجل اعدام نبيل عيوش و لبنى ابيضار ” ! الشعب لي شاف بعض المقاطع و عوض يناقش الفيلم في البعد ديالو الفني و الابداعي بدا كايناقشو بمعيار حرام حلال ! خاص ماخاصش …الشعب لي كايعرف يعاير و يسب و يهين الممثلين و الفنانة و كايعرف يحتل الصدارة فمشاهدة الافلام الاباحية فالانترنيت …

تمنع الفيلم و تحققات الديموقراطية ! رأي الاغلبية هو لي دار بيه واخا الاغلبية فبعض الحالات راه هي لي وصلات هيتلر و موسولوني للحكم ….

تحقق حلم الاغلبية ديك الاغلبية لي خدات تصاور ديال عيوش و دارت ليه ودنين و سماتو “خنزير صهيوني من اصول يهودية ” ! الاغلبية لي كاتشوف نظرية المؤامرة فكلشي من بامبرز حتى للماكدونالد و اولويز و البوكيمون ! ديك الاغلبية لي مازال بالنسبة ليها “يهودي” معيورة …

تمنع الفيلم حيت قالك كايحرض على الفساد، حيت لي شافتو غاتخرج من دارها و غاتمشي توقف دير الطروطوار و لي شاف فيلم عيوش غاتشدو الز…لة و غاولي تاهوا مزاحم مع ختو كايديرو الطروطوار …

تمنع الفيلم حيت المغاربة على سبة ، قيمهم هشيشة و اخلاقهم مرخية و الريح لي جا يديهم ، خافو من فيلم عيوش يفسد ليهم اخلاقهم و اخلاق ولادهم و ماخافوش من القرقوبي لي كايتباع طاي طاي فالليسيات و الكوليجات و ماخافوش على ولادهم من مستوى الصحة و التعليم و الحرية لي غادي و كايرجع باللور…

ايوا هاهي الديموقراطية تحققات ليوم ! و الشعب اختار باش الفيلم مايتعرضش و نزولا عند طلب الشعب و الاغلبية طبعا المسؤولين لي مابغاو صداع دارو ديك القضية لي كايديروها الوليدين فاش كايدابزو ليهم جوج دراري على كورة و كاينوض الاب كاعي من النعاس كايشد كورة يقطعها و يلوحها ليهم ! بلا مايعرف شكون ظالم شكون المهم الاب ينعس و يدير لاسييت و هو هاني …

يالاه وا فرجونا دابا فالاخلاق و القيم لي كاتقطر من المجتمع المغربي و لي كانت شوية و تختفي بسباب عيوش ، هاهو رمضان على الابواب ، عنداكم عاوتاني تبداو تشانقو على السويهلة فالسويقات ! و عنداكم تعمر كوود بالاخبار ديال ” بسبب مناوشة بسيطة شاب من مدينة كدا يذبح صديقه من الوريد الى الوريد دقائق قبل الفطور” شورو شوية على القيم راه كاتبان بزاف فالشهر الفضيل خصوصا قبل الفطور…
طاحت القيم …. علقو نبيل عيوش !