حكيمة لعروسي كود ////

شهر اكتوبر السعيد و في بلاد الانوار اللي كتطفي الضو في لاتور ايفيل مع العشرة ديال الليل ماعدا نهاية الاسبوع كيطفاو الضواو مع 12 ديال للحفاظ على الطاقة ، ولكن ماذا عن الامن و الأمان يا بلاد الأنوار؟؟ في شهر واحد السطو على كيم كارديشيان ومحاولة اختطاف هيفا وهبي ديك الطريف ديال الفرماج ، و القبض على سعد لمجرد في قضية اغتصاب بدا الحب بالليل وسالاه في الصباح مع الشرطة ، واش هادشي كلو صدفة او رسالة باش يقولو للفنانين باريس ليست بلاد الفسق والغناء و الرقص باريس ارض الله المقدسة ستطلق الاذان من لاتور ايفيل .

قضية سعد لمجرد كاتخلينا نطرحو بزاف التساؤلات علما ان هاد الفنان نجاحو مزعج باقي صغير وزوين و مبدع ديما جايب الجديد ، ومن المغرب وصل لمصر بأغانيه فاش كنت في مصر كلشي طالق اغنية لمعلم و كولشي كيسولني عليه بنات وولاد ، انا بعدا تايعجبني وتانصنط لأغانيه ملي سمعت خبر اعتقالو وانا متابعة القضية وقريت مجموعة من الأراء لقيت بزاف الدراري شامتين فيه يمكن حيت كايعجب صحاباتهم و لا ماعرفت المهم انه فنان مغربي و بقا فيا لان المتهم بريء حتى تثبت ادانته ، و القانون في فرنسا كايعتمد على براهين وادلة ولكن في قضايا الاغتصاب تايكون التحقيق بزاف لان بزاف البنات كيلعبو بالقانون في هاد القضايا خصوصا انني عايشة في اسبانيا و شفت بحال هاد القضايا من قبل كيمشيو فيها الرجال بحيتااا ….. من اهم الامور هنا لادانة الرجل خاص تقرير طبي ماشي فقط يحمل عينة مأخوذة من السائل المنوي اللي يثبت حصول مضاعجة لااااا خاص التقرير يكون متضمن اثار عنف على الجسد و اثار عنف في فرج المرأة هنا ممكن بعض الناس اللي مافاهمينش هاد النقطة يقولو كيفاش ؟؟ نشرحليكم اعزائي وهادشي علميا لا حياء في العييييلم ملي تاتكون المضاجعة بالقبول طبعا كتبدا العلاقات بحركات مثيرة بين الجنسين مما يساعد على خروج افرازات من المرأة تسهل ولوج العضو الذكري كما عند الرجل عند اتمام الانتصاب الكامل يخرج سائل لزج من قضيب الرجل لتنظيف المسالك التناسلية من بقايا اي حمض بولي ممكن يقتل الحيوانات المنوية وايضا لتسهيل الولوج المهم هاد السائل خصوصا عند المرأة كيسهل كيفما قلنا ولوج العضو وماكيحصلش احتكاك مؤلم ممكن يسبب تقرحات في المهبل ، اما في الاغتصاب تحدث تقرحات لأن المرأة تكون غير جاهزة للمضاجعة وتاتكون رافضة وتاينعكس الامر بانقباضات في المهبل ، ورغم ذلك مازال الامر صعب الثبوت علميا الا ان ضروري تكون اثار كدمات في الفخدين عندما يصارع الرجل المرأة من اجل فتح رجليها لاتمام الاغتصاب ولنتذكر قصة الاغتصاب الشهيرة في مصر اللي سبع شباب اغتصبو فتاتة وبقات عذراء وتصورات فيلم واثارت ضجة آنذاك .

المهم الدلائل و البراهين في يد الشرطة الفرنسية التي اثق في امكانياتها وخا كيستاعنو بعض المرات بالشرطة المغربية اللي معروفين ايضا بقدرتهم على كشف الحقائق في القضايا الصعبة و المستحيلة .

في قضية سعد ممكن نقولو واحد كيطلع للمسرح البنات كايسخفو مامحتاجش للاغتصاب ولكن في نفس الوقت مانساوش ان الاغتصاب مرض نفسي ممكن تكون ليه علاقة بالكبت وممكن لا ، و لكن كاينة واحد النقطة اغتصاب في اوتيل معروف صعيب الحال خصوصا ان اللي سبق وجلس في الماريوت غادي يعرف انه من الصعب باش مانقولش مستحيل ان شي واحدة تغوت و مايدخلوش عليهم خصوصا ان خروج البنت كان تالصباح و بملابس داخلية يعني خدات وقت تلبس كيلوطها وسوتيانها وممكن خرجات بهاد الطريقة باش تثبث التهمة على سعد الامر محير و ملابسات القضية ماشي ساهلة باش اي حد يحللها احنا غير سايرين داويين وخلاص حتى يبان الحق و تقول الشرطة والمحكمة كلمتها .

اما بالنسبة لسعد اذا كان فعلا اقترف الجرم فانا ماغاديش نتعاطف معاه و خا يكون خويا لا تعاطف مع الاغتصاب ، وهو في هاد الحالة اكيد غالط وخا يكونو لعبو بيه لانه كان خاصو يعرف ان فنان بحالو شهرتو مزعجة للعديد و هو على دراية بالمجال الفني ان بعض المنافسين كايفقدو الحس الفني و كايتحولو لمافيا لانهم مراض بالشهرة و مايقدروش يسمحو لشي حد يشاركهم في الساحة و ياخد الأضواء غادي يبغيو يقولبوه بأي طريقة وبدون رحمة وخاصو يعرف ان شحال من واحد تابعو ….

وغير المنافسين سعد خاصو يكون بروفيسيونال أكثر غادي للخدمة ماغاديش دوز فاكونص وقت الخدمة خدمة ماكاين لا بنات ولا سهير ولا ضحك ولا لعب ، من الاوتيل للشوبنغ للمسرح مع منظمين الحفلة رجلك برجلهم وتاواحد مايدخل للغرفة ديالك اللي بغاك يتسناك في الاستقبال شرب معاه قهوة ماتشربش الكحول نهائيا وايلا كنتي كتشرب من حقك انت حر ولكن في الخدمة الشراب لا خود كاس واحد للمجاملة فقط وتاواحد مايدخل لغرفتك الخاصة لان فيها متعلقاتك الشخصية وممكن اي واحد يدس ليك شي مصيبة ، و هادي مجرد نصيحة دير كيفما تاندير انا في المهرجانات كنسد عليا في بيتي و كنتصنت لعظامي ونوجد راسي و موسيقتي ماكنخرج ما كنتسارا الا مع المنظمين وكنشبع نعاس باش وجهي يكون مرتاح حتى نسالي خدمتي ، وبالنسبة للبنات اللي تابعينك او بالنسبة لشهوتك الجنسية اخي سعد علق على عضوك لافتة خارج الخدمة صالح فقط للبول وملي تمشي فاكونص وتاواحد ماسايق ليك الخبار فين انت عيش حياتك ولكن بحذر شديد لانك متبوووووع وبجهد راه كلنا تانغلطو لاننا بنادم و لكن غلطة الشاطر بألف وانت معلم .

نتمنى ايلا كنتي بريء خويا سعد تخرج من هاد المحنة و تكون درس ليك في حياتك عمرك ماتنساه ، وايلا كنتي مذنب اللي دار الذنب يستاهل العقوبة ، وكانظن ان مجرد شهوة ماتستاهلش تبيع من اجلها جمهورك بالرخيص .

وننتظر قرار الشرطة والمحكمة في الاول والاخير لان هادشي غير مجرد شكوك وتخمينات .

رسائلي للكبار فهما لا الكبار سنا
الله يجيب اللي يفهمنا ولا يعطيناش