مقرب من رئيس مجلس النواب ل”گود”: التمثيل النسبي والدستور كيعطي الحق للاتحاد الاشتراكي لرئاسة لجنة العدل والتشريع
كود : سهام البارودي///
كاين جوج أنواع ديال اللحم فالعالم كايتعتابرو من أغلى اللحوم ! كاين اللحم ديال واحد البگر سبيسيال ففرانسا كايسوا شي 3 ديال مليون سنتيم للضلعة إيه آ سيمحمد ضلعة ديالو ساوية ثمن ضاسيا ايصانص بونوكازيو موديل 2009! و كاين واحد البگر أصلو جابوني سميتو ال kobé ! هو ثاني أغلى لحم بحيث لابغيتي دوق غي شي سطيكة ديالو خاصك تحط شي 4000 درهم !
علاش هاد اللحم غالي ؟
حيت آسيدي الناس لي كايربيوه كايتهلاو فيه مزيان و أهم حاجة، كايديرو معاه كلشي باش يعيش مرتاح و مايتعصبش و مايتستريساس !أهم حاجة هي يعيش مرتاح و يبعد على الأعصاب! لدرجة حتى العلف ماكايبغيوهش يتعذب و يمشي يسرح باش يعلف، كايجيبو ليه اجود أنواع القمح تال عندو ! و فوق من هادشي ماكايترباش فحال البگر لاخور لا ! هاد النوع ديال البگر عندو تعامل خاص كايديرو ليه ماساج باش يترخا ،وا تصنط آ بعرور! و كايطلقو ليه الموسيقى الكلاسيكية، ايه نعام آسسس و كايوفرو ليه مساحات خضراء كبيرة باش يستمتع بالمناظر الطبيعية ! و فوق من هادشي كايعطيوه شي يطرو ديال البيرة فالنهار حيت البيرة كاتساهم فالهضم!
بگر عايش واكل شارب ناعس مرولاكسي مع راساتو …
فاش سولوهم علاش كايديرو گاع هادشي مع البگر ديالهم؟قالو ليهم بلي للبگر فاش كايتعصب كايتزاد الحموضة ديالو ! و لاتزادت الحموضة ديالو كايولي لحمو باسل و هوما باغيين بگر يوفر أحسن و ألذ و أرقى لحم فالعالم، يكون بنين و رطيطب.
وانا نقول مع راسي كون طلو على لحمنا حنا المغاربة و الحموضة ديالو كون كحلو بالعما، حموضتنا فاتت القياس، واقيلة كون يذبحونا و يبغيو ياكلونا موحال گاع واش نطيبو على ماكايدوز علينا من أعصاب و ستريس ! غايلقاو لحمنا مكنزز فحالنا !
غي لافقتي الصباح و خرجتي فكازا غايبان ليك كلشي مخنزر و معصب و وجهو منفوخ فحالا معشي بالفاخر! فالفوروجات بنادم معصب كايكلاكصوني ! فالطرقان بنادم مصعب كايسب! فالادارات الموظفين كايستقبلوك بأحسن تخنزيرة !فالطوبيس المواطنين كايدفعوك و يعفطو عليك و لا هضرتي كايحل عليك شي مسخوط الواليدين معمش فمو فيه ريحة شي طوبة ميتة و كاينهض فيك ” آآشد طاكسي آ خونا لابغيتي تيسااااع” كلنا معصبين و عندنا تصرفات عدوانية مع بعضياتنا ! لدرجة ولا أي واحد كايتعامل معاك مزيان كاتشك فيه باغي يخورك ! البنت لا ضحك معاها الولد فالزنقة كاتهرب للطروطوار لاخور ! لا قال ليها ”صباح الخير” كاتجاوبو ” تفو صبحنا ع الله “ ! مول الحانوت لا عطاك الخاطر كاتعاود تحسب الصرف لايكون رزاك فشي دراهم ! العدوانية ولات عندنا هي الأصل و الضرافة مشكوك فيها.
بنادم كايخرج للزنقة فحالا خارج يتحارب كلشي معيط على خزيت و على نقشة أي واحد يقدر يشعل معاك.
وطبعا كل ماتزادت الحزقة ديال الفرد كلما تزادت العدوانية لي فيه و كلما لحمو حماض و تكنزز و مابقاش صالح للأكل
و طبعا كلما تزادت ترفيحة الفرد كلما قلات العدوانية ديالو، حيت فالوقت لي بعرور مشانق فالطوبيس مع الكونطرول لي حصلو سالت كايتغاوتو “آ و الله ما نهبط ” “آ و الله تا تهبط “ ! تاكاينقز شي جلاخة اكثر منهم يغوت على الشيفور ” آ ضور دينمو للكوميسارية ” و كايصدق الطوبيس كلو غادي للكوميسارية على ورقة ب 4 دراهم !
فنفس الوقت كاين واحد السيد كايمارس اليوگا باش يدوز نهارو zen ! قبل مايتكا فوق ناموسية و تجي شي طايلاندية دير ليه ماساج رولاكسو !
فاش كادير مقارنة بين حياة البگر “الكوبي” فالجابون و حياة الكائن المغربي فالمغرب… كاتشها تكون تانتا بگرة مجبدة فشي مزرعة جابونية كاتاكل الشعير و كاهضمو بالبيرة و كاتسنط لشي ديسك ديال موزار …