محمد سقراط كود ////
بحال ديما سعد المجرد فنان خفيف ، والميزة ديالة فهاد الخفة ، خفيف على القلب وموسيقتو خفيفة وحتى الفيديو كليبات ديالو ، كتبانليك خدمة زوينة ولكن خفيفة مامبدولش فيها مجهود كثير ومكاين لاش أصلا ، أصلا المستمع لي كيتوجه ليه سعد لمجرد ماباغي تقل ماباغي خثورية باغي ديسك يدندن معاه ويشطح عليه ويكون ساهل يحفضو دغية ، وهادشي لي خلا سعد يوصل للعالمية .
هاد المرة سعد مابدلش كاع مجهود ففيديو كليب جديد ديالو ، شد فكرة ديال ماد ماكس وحطها ومغربها ، بانت حقيرة للأسف كأي حاجة عالمية واعرة الى مغربتيها ، ولكن على الأقل سعد عودنا على الجديد ديال الخفوفية ، بحال فيديو كليب دال انت معلم ، كان مبتكر وأصيل بعدا بالنسبة لشنو كاين فالسوق ، هاد غلطانة الطاقم ديال سعد مخدم حتى ذرة ديال الإبداع كتافى بأنه يهز لقطات من فيلم ويحشرهم ، الخدمة لي يقدر يدير أي مبتدء وهادشي لي معودناش عليه
